異動空間：究竟追貨定減持
淡友本月食飽飽埋單走人，平淡倉買盤帶動港股反彈。執筆時8月份期指未平倉少咗6.2萬張，9月份多咗6.8萬張，總數已達23.7萬張，遠多於9月恒指的7.5萬張，反映下月主戰場將是H指。炒股係計值博率的遊戲，H指連插四個月，市值蒸發三分之一，除非中國真係爆出金融
危機，否則賭H指下月反彈，勝算應高於賭佢再落。
係咪要即刻落場掃貨？又未必。中港股市目前氣氛仍相當弱，昨日《蘋果》記者落證券行問一位散戶：「你覺得恒指可反彈2,000點嗎？」答覆係直截了當的一句「咪發夢啦！」港股尚且如此，俾阿爺玩到七竅生煙的A股大媽，見反彈九成九會沽貨，可見短期沽壓仍沉重，隨時落去做個雙底先正式展開反彈浪。現時零持貨現金充裕的戰友，自問貼市轉身又快的話，小注趁回吐吸納無妨，但若已成手蟹貨，建議仍是趁彈減磅，絕不宜加注溝貨。前幾日fb講過，目標宜鎖定科網、基建、國企改革三大範疇，更勇進就只能博九線股仔。中航科工（2357）、中船防務（317）、銀泰（1833）及網龍（777）走勢不錯，可先列入觀察名單。
魏力
http://www.facebook.com/2012jason
魏力
異動空間 - 魏力 舊文