一周三件：重慶行平靚正
■甘為民任主席的重慶銀行，已公佈的半年業績理想，前景樂觀。 資料圖片
重慶銀行（1963）跟中港股市大插，幾乎跌番落一年起步位置，而啱啱派上半年成績單，交足功課，預測PE比行家平均值平咗一截，殘到無朋友。
盈利增長數一數二
重慶行今年上半年盈利增長近10.3%
，喺已經派半年成績單嘅行家中，盈利增長幅度，係數一數二至靚仔嗰一批。今年上半年，重慶市GDP增長11%，位列全國之首，市內除咗好似傳統汽車產業，包括一啲高端行頭，好似機器人同智能裝備產業，亦都成形，今年可以實現產值150億元。成個重慶市，唔係走單一瓣數，或者食老本。
之前講過，重慶市就一帶一路，會投放上萬億元，喺大型基建。睇到係，食住地區多元產業瓣數，同一帶一路國策，重慶行已經贏在起跑線。
呢轉阿爺雙降，高盛即時為內銀做盈利敏感度預測，得重慶行同重農行（3618）可以受惠，重慶行明年盈利兼可以因為減息，而提升1.9%。場內專業評估，重慶行喺計攤薄反映前，今、明兩年EPS1.13元人仔同1.23元人仔，明年預測PE，得3.8倍，平絕行家之餘，比起行家明年平均5.2倍PE，平咗一截！
重慶行現價（5.83元）明年預估PB，得0.75倍，比行家平均0.8倍，又有折讓。而今年6月尾重慶行計劃配股畀生命人壽、世茂（813）等大孖沙，建議獲通過，但重慶行一個唔該，插咗落嚟，現價比建議配股價7.65元，折讓咗24%！
係咁意計重慶行現價要升32%，先上到呢個計劃配股價水位，到時，重慶行預測PE先挨近5倍，仲未追到行家平均值。
錢雋
細價股專家
本欄逢周一、三、五刊出
錢雋
一周三件 - 錢雋 舊文