中環在線：
環球股市坐過山車
股民最想財爺指點迷津
近日環球股市chok到不得了，股民好似坐緊超級無敵過山車，喺呢個時候，手上持有大批蟹貨或者未對股市死心嘅股民，通常比較勤力睇投資專欄或者讀報，以參考各方專家言論，當係做心理治療。
華華近日做咗一個散戶調查，股民竟然最想財爺曾俊華喺
跌市中指點迷津，財爺果然深得民心喎。
華華日前透過電話做咗個簡單嘅散戶調查，原先以為多數人失意或倒楣時都會走去求神問蔔，希望預知日子將會否極泰來，估中今年跌市嘅風水師蘇民峰一定最受歡迎，最多人希望佢喺股災中講幾句，指點迷津，點知150名受訪者當中，唔夠兩成想搵佢幫手。
超人屈居第二
散戶最buy嘅竟然係鬍鬚曾，有45%受訪者想聽佢講幾句，連「超人」李嘉誠都冇得同佢比。可能超人實在太有錢，區區一個股災，對佢身家影響輕微，加上超人近期都唔願意評論股市，今年6月佢出席股東會後直情話「股市不嬲唔講，我唔想害人」，所以散戶對佢都冇乜期望。
反而鬍鬚曾始終係財金官員，而且形象一向比較討好，人心惶惶之際見到佢，總算感覺良好。佢本周一喺股市大跌後出嚟話𠵱家唔係金融危機，雖然冇人知事情將會發展成點，但總算畀到定心丸大家。
咁如果大家唔好彩，喺呢次股災輸咗錢，又將會選擇做乜好呢？竟然有接近四成受訪者話以後唔再買股票，好激啫！
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文