中環在線：嫌奶黃月無新意
星洲國宴名廚 製30年陳皮月餅
■莫傑強經反覆研究，搵出陳皮與紅豆嘅黃金比例。
半島酒店嘅嘉麟樓奶黃月餅紅到發紫，早排仲有人因為諗住平少少買到嘉麟樓月餅券而被呃錢，其實要搵價錢超過400元嘅名牌月餅，香港地有唔少選擇，九龍香格里拉酒店嘅香宮中菜行政總廚莫傑
強就嫌大家年年都講奶黃月餅，今年炮製30年陳皮紅豆月餅。
■香宮的30年陳皮紅豆月餅，一盒438元。 羅君豪攝 陳皮配搭紅豆
莫傑強師傅大有來頭，佢最拿手做粵菜，上世紀90年代到新加坡工作，一做廿年，其間經常被請到新加坡總理府主理國宴，又曾經被摩洛哥國王邀請到摩洛哥皇宮做兩星期禦廚。
做粵菜多年，其中一樣，佢最有研究嘅食材就係陳皮。佢如數家珍咁話「（果皮）超過5年先叫陳皮，5至10年嘅效果唔好，20年嘅味只得八成，超過30年就未必容易搵到，30年就啱啱好，味道香純又名貴」。
佢見近年市場主力推奶黃月餅（香宮都有賣），反而想試做傳統口味月餅，「最初試做，唔可以落太多陳皮，太多會有澀味」，經反覆調校，佢先研究出陳皮與紅豆嘅黃金比例，𠵱家每個月餅約有1至2克陳皮，食落的確係啖啖陳皮甘香，而且有aftertaste。
大家都知陳皮具有投資價值，年代久遠嘅靚陳皮可以價值不菲，據聞市場上30年陳皮閒閒哋每両要400至600元。為維持陳皮嘅來貨價，莫師傅今年初構思做呢款月餅時，就開始慢慢入貨，加上本身存貨，才足以應付今年供應，可惜佢點都唔肯透露30年陳皮嘅存貨量與總值，好神秘呀。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文