滙海探戈：唔貼市咪亂玩
阿爺救市藥石亂投，引爆環球大冧市，上周最凶險時油金股滙處free fall狀態，有金融海嘯feel，稍後回穩，但自從8月11日人仔貶值搞亂檔，全球股市至今蒸發近6萬億美元市值都咪話唔得人驚。
上周沽Yen隨時輸清
以滙市為例，喺市場最恐慌時，資金蜂擁流入美債和
日圓等避險資產，之後又隨著市況已掉轉行，波幅之巨近期罕見。日圓喺周一美股開市大冧逾千點時，一度飆升4.8%，攀上116.07兌1美元七個月高位，近年成為套息交易融資貨幣嘅歐元，當日亦因拆倉曾急彈近3%至1.1715美元，但全周收市時日圓僅微彈0.3%，歐元更要倒跌收場。假設閣下期間做20倍或以上外滙槓桿，若沒有緊貼市況或設定止蝕，隨時行過轉就一鋪清袋，當前風高浪急下，切記做好風險管理。
聯儲局兩周多後又議息，市場原估計9月加息機會五五波，但大冧市後加息呼聲急降，儲局副主席費希爾喺Jackson Hole年會補飛，話儲局唔使要通脹達標至加息，但佢亦同時提到儲局家陣對中國形勢格外留神，加上杜德利早幾日亦話加息急切情況降溫，筆者料9月唔加機會較大。美國本周五公佈8月就業報告，市場估計增加22萬職位，失業率降至5.2%，連同周三出爐嘅褐皮書，都係儲局9月17日決定加息否的重要參考。
奇兵
本欄逢周一刊出
奇兵
滙海探戈 - 奇兵 舊文