魚樂無窮：
9月股市點樣走
■港股9月就好似虛擬森林，入面有大量獅子老虎等兇猛野獸。 資料圖片
上周五期指結算，唐牛繼續實行遠離股市策略，全日只望了指數表現三次。第一次，開市，高開近600點；第二次，午後開市，升幅收窄至200點；第三次，收市後，倒跌226點。與其說高低波幅逾800點
，實際是自高位由頭沽到尾，淡友8月連尾彩都拎埋，大勝而回。
眼前有一個森林，傳說森林深處有一個寶箱，冇人知道寶箱入面係乜，可能係數唔曬嘅金銀珠寶，亦可能係散紙幾張，甚至係乜都冇，同一時間，森林入面亦有大量獅子老虎等兇猛野獸，激嬲佢哋，好彩嘅就損手爛腳，唔好彩嘅隨時出唔番嚟！呢個虛擬森林，正正係港股9月嘅寫照。阿爺講明閱兵前要穩定股市，潛台詞係之後我唔理，當然，A股嚴重扭曲，阿爺講過嘅嘢可以唔算數，後市點睇，正如寶箱入面有乜一樣︰冇得估！儲局下月中議息，加息與否未有共識，一旦淡友仍執主導權，就好難有運行︰加息？新興市場繼續走資，港股肯定冇運行；唔加息？即係美國經濟唔掂啦，仲買股票？公佢贏字你輸，惡過獅子老虎多多聲。
內銀業績危危乎，盈利持平壞賬續升，假如下半年冇改善，減派息乃時間問題，上星期五嘅洗倉潮，相信只係熱身。銀行乃內地經濟嘅命脈，佢都唔掂，其他行業會係點？心中有數吧！講到呢度，大家仲會唔會行入呢個森林呢？
唐牛
https://www.facebook.com/tongcow88
唐牛
魚樂無窮 - 唐牛 舊文