一周三件：盈大有權升呢
■李澤楷任主席的盈大地產，手頭淨現金足兼超過總市值，有執筍嘢嘅優勢及條件。 資料圖片
盈大地產（432）醒目到痹，上年出售最大撼內房資產，避過咗呢轉人仔貶值大浪同橫風橫雨潮，手頭淨現金，兼超過總市值，有執筍嘢嘅優勢同條件。
現金多可變身
盈大喺上年4月宣佈出售
北京盈科中心，總代價由72億元升到72.8億元。人仔貶值前，盈大早著先鞭，出售內地資產，小小超真係好似揸咗個水晶球。盈大變現盈科中心、連減債之後，去到今年6月尾，手頭現金近22億元，就算扣埋數碼港計劃應付特區政府款項3.2億元，淨現金仍然高達18.8億元，或盈大每股4.67元，係盈大現價（3.21元）嘅1.45倍！
電訊盈科（008）家陣揸住盈大，超過70%，但盈大出售盈科中心後，係無任何特別甜品派送，回饋大、小股東，集團留番咁多淨現金喺手，呢嚇耐人尋味。又粗略咁計數，以30%至40%呢個安全水位嘅淨借款比率（比對總權益52.9億元）計，盈大手頭現金，將可以提升到53.5億至近59億元。亦諗到係，盈大只要進行適度槓桿，已經可以為集團提供更多銀彈；而呢期外邊橫風橫雨，亦畀到盈大執平嘢機會。
盈大市值得12.92億元，未計攤薄前，得0.24倍PB，就算連埋紅利可換股票據攤薄計，1倍PB。阿媽電盈，市值308億元，近3倍PB。小小超系統，仲有香港電訊（6823），1.8倍PB，市值更高達685億元。盈大PB屬系內至平，市值亦未夠香港電訊2%！奀奀豬，最有條件俾小小超湊大。以盈大去番未計攤薄前每股淨現金4.67元計，講緊都要升45%，總市值都係得19億元咁大把。
錢雋
細價股專家
本欄逢周一、三、五刊出
錢雋
一周三件 - 錢雋 舊文