魚樂無窮：半新股突圍玄機
良斯集團最新市值5.7億。圖左為集團主席梁興隆，圖右為行政總裁兼執行董事周梅莊。 資料圖片
《蘋果》頭版報道，二手樓市冰封，有地產經紀率先陣亡，有人兼職賣門鎖，有人轉行賣吸塵機。點解會有呢個現象？同股市不無關係︰股市唔掂，間接令經濟活動放緩，買樓賣樓當然要諗
過度過，前者不追價，後者不劈價，造成買賣兩閒。儲局本周議息乃另一致命因素，未來三個月美國大有機會加息，係金融海嘯以來第一次，完全冇先例可尋，睇定啲好正常。
新股市場同樓市有異曲同工之妙︰市場氣氛差，大戶散戶慳住荷包，要圍飛難度倍增，市傳舊年話要上市嘅香港航空再一次夭折，就知情況一樣係寒冬。由此引伸，近期能夠成功上市嘅，肯定會做得好好睇睇，事關保薦人都要食飯，客仔上市後股價靚仔，市場有口碑，新客自然自動上門。半新股順客隆（974）失驚無神炒高65%，變得有根有據。
半新股當中，唐牛比較喜歡主打一站式綜合室內設計解決方案商良斯集團（1683）。上市冧巴由兩個大客——新地（016）及信置（083）組成，易記之餘更突顯有名牌照住，贏在起跑線。最新市值5.7億，大股東揸75%，街貨只得億零錢，要舞上話咁易，噚日創上市新高後倒插12%，震倉味道極濃，候1.1元買入，招股價1元作止蝕，一成博幾成水位，諗得過！
唐牛
https://www.facebook.com/tongcow88
唐牛
魚樂無窮 - 唐牛 舊文