金融High Tea 2015年9月15日
內期等埋單
2015年09月15日
國務院宣佈國企改革方案，有外資大行發表報告，料對估值將有重大影響力，對H股股份相當有利。不過，中港股市對消息反應不一，兩地股市齊齊高開，但內地受券商股拖累下插收市，但港股幾強，守住唔願跌，仍然可以頂住升到57點收市。
阿爺再出政策刺激市場信心，
日前宣佈的國資改革頂層設計這一重磅利好消息，又改銀行存款準備金的計法變相放水，但淡友依然無面畀，吼住券商股作為做空主要目標，結果搞到內地股市高開低收，上證指數險守3100關收市，收報3114點，跌85點，跌2.7%；深成指數報9778點，挫685點，跌6.5%；創業板指數報1906點，挫154點，大跌7.4%！
查配資搞殘券商股
內地券商股俾人狂插，內地證券界老友話，股市跌同監管當局調查配資、限制期指交易有關。?家內地股市交易量明顯萎縮，加上周五期指結算埋單計數，淡友自然借勢隊一隊先，搞到內地有重大好消息下，仍然被人打窒條氣。
相比之下，港股能夠頂住唔肯跌落去，已經算係咁啦。港股相對強咗，可能同資金流有關。收市後金管局公佈，港元匯價觸及強方兌換保證，金管局向市場注入65.88億港元，令周三(16日)本港銀行體系戶口結餘增加至3335.33億港元，反映人民幣拆倉活動仲未完結，仲有資金泊入來香港。初時話驚外資調錢人仔會插，變成香港錢多也不代表是好事，但人仔匯價稍稍反彈，咁香港錢多的效果又似會慢慢發酵出來。
人仔經過八月初震盪，阿爺見勢色唔對，加上習大大訪美見奧巴馬在即，人行開始托番高啲價。睇番上月內地資金外流不絕，人行數據顯示，8月底，中國金融機構外匯佔款按月下降7238.36億元人民幣，至281.87萬億元人民幣，創歷史最大單月降幅。花旗銀行環球個人銀行服務香港區總經理伍燕儀就透露，早前人民幣貶值，有客戶因而決定將資金轉至港元或美元以避風險，相信短期內仍有資金流出。
她認為，本港人民幣存款年初至今仍以倍數增長，相信整體資金壓力不大。預期今年底人民幣兌美元跌至6.8，相當於目前再貶值約6%，而明年底則見6.7，而預期內地會繼續實行寬鬆貨幣政策，未來續有一次減息，估計降準3至4次。
現時港股主要觀望聯儲局議息及A股期指結算，所以買賣兩閒。恒生指數收報21561點，升57點；國企指數收報9728點，升10點，成交縮至696億元。
759炒消息要手快
內地股市大瀉，中資證券股拋售壓力大。中信證券(6030) 挫3.7%，海通證券(6837) 違規被罰，全日挫3.8%，報11.54元，為包尾國企指數成份。A股相關ETF同樣捱沽。追蹤內地創業板指數的南方中創業板(3147) 最傷，瀉5.6%，造8.5元。
喺市場買意唔係咁明顯下，好多二、三線都偏軟，下跌股份都有成九百隻。阿信屋順豐結盟，計劃年內開30間聯營店，CEC(759) 早前大力抽上後，如今要嘔番突出來，最低見過1.73元，挫6.4%，報1.75元。順豐做物流做到嘭嘭聲，個名當然夠大，但佢打開門口做咁大生意，當然歡迎同人合作，咁唔代表有大茶飯。阿信屋上周借住消息由1.45元，兩日抽上2.19元的高位，之後回得亦急。淡市炒股，至緊要手快。
陸羽仁
金融High Tea 舊文