智取大市：
港股恐步台股後塵
■港交所行政總裁李小加指目前並非討論互聯互通的合適時機。 資料圖片
港股同A股互聯互通，本來就係兩隻手掌先能夠拍得響嘅事，但在於港交所（388）角度，點都應該表明爭取互聯互通，先至符合港股投資者嘅利益。
不過，港交所行政總裁李小加近日講咗一番說話，內容提到
「目前於心理上，並非討論互聯互通的合適時機，現時在內地救市之際，市場當務之急是需要冷靜下來，並尋找應對方案才繼續推進。」說穿了，就係互聯互通暫時唔符合中央利益，所以港交所而家講到明都唔爭取了，又再一次將「港交所只因應中央利益行事」嘅立場完美演繹。
好股太少劣股太多
作為一個港股投資者，晉佳流住市儈股票佬嘅血，香港有冇真普選，對於呢類市儈股票佬嚟講，未必即刻死得人，但係負責寫港股遊戲規則嘅港交所都只會將利益傾斜於中央，咁就真係殺到埋身。
幾個月前講港股A股化，心諗「No way」，市場係變咗質，但都未至於想同佢斷六親。不過，呢幾個月，大家見識到A股制度嘅可怕，股災一出現，就禁止大股東同管理層沽貨、大手沽空要當賊辦、傳媒工作者發佈利淡傳聞又拉又鎖，對於投資者採取輸打贏要嘅態度。
試問入到賭場，換咗籌碼賭錢，贏又好、輸又好，賭場都唔畀客人換番錢走，以後點會有人願意入去玩。而家聽到港股A股化，真係覺得難聽過粗口。
對於晉佳而言，長期投注港股，自然建立咗深厚感情，但對於外資嚟講，並無特殊僻好，話唔玩港股就可以隨時沽港股離場，以後亦好難吸引新錢番嚟玩，註定長遠都跑輸歐美日，呢個就係市場變質所帶嚟嘅惡果。
有戰友講到，港股未來並非A股化，而係會台股化，原因係台灣投資者，有番咁上下功力嘅，早就已經走去投資美股，唔會再買台股，港股只會面對同一下場。再講，港股同台股同樣係好股太少、低質股太多，無論你花幾多精力去分析，港股同台股嘅上市公司高層都唔會因為你嘅努力而被感動，不會送你豐厚股息，只會繼續送給你負能量。
如果港股真係步台股後塵，港交所同本地證券股，長遠唔會再係value play，股價更加係弱中之弱，只會有反彈、冇升幅。
講番短線好似冇咁絕望，晉佳早兩個星期講過，未來會有港股短線反彈嘅機會，但要見到上星期講過三大見底訊號出現，先至係博反彈嘅好時機。
一星期過去，大戶們依然每日不停沽貨，反映港股現價遠離吸引水平，估計遲早要出現恒指單日跌超過2,000點，先接近見底，所以惟有繼續等機會。
所謂機會，請注意，只是短線機會。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文