魚樂無窮：兩份通告一個亮點
■景福舊年已有投資者傾賣盤，證明大股東對易手持開放態度。 資料圖片
錦藝（565）發通告表示，鑑於紡織業營運困難，故向李力出售漂染客戶供應之坯布及試織坯布業務，總代價2.6億元，預計收益2,328萬元，往後將集中火力從事物業營運業務。另邊廂，奕達（2662
）發通告表示，持股74.35%嘅主席兼大股東林志豪，正與潛在買方洽售全部股權，變相賣盤。
兩份通告內容不一，但殊途同歸，亮點只有一個，就係玩變身，亦反映殼股有價有市。兩間公司齊齊復牌，分別升18%及11%，更帶動潛在殼股喪炒一番，經過嚴格篩選後，唐牛認為市值僅6億嘅景福（280）最具可塑性。
首先，景福與錦藝一樣，主業前景極差。景福乃老牌金飾股，但受零售寒冬影響，加上金價牛去熊來，業務近年急轉直下，兩個財年一共蝕近3億元，每日輸40萬元，再做落去仲有乜意思？其次，景福控股權與奕達一樣咁堅實。公司7月公佈5供2集資1.5億元，由於當時正值股災，供股最後不足額，大股東包銷下，持股由原來嘅49%，增至61%，貨源更歸邊。
最重要係，景福舊年已有投資者傾賣盤，證明大股東對易手持開放態度，以現時市賬率僅0.6倍兼有淨現金揸手嘅優勢，叫價只會越來越高。現價較供股價0.6元高一成，但潛在升幅可以倍計，如此低風險高回報機會，戰友們請捉緊！
唐牛
https://www.facebook.com/tongcow88
唐牛
魚樂無窮 - 唐牛 舊文