金融High Tea 2015年10月30日

金融High Tea 2015年10月30日
平股搖搖板
2015年10月30日
　　美國聯邦儲備局會議結束，會後話會在十二月會議檢討加唔加息，美股大彈，港股喺中共十八屆五中全會閉幕後悶落。

　　恒生指數收報22819點，跌136點；國企指數收報10439點，跌119點，成交略增至707億元，主要係權重股好似國壽(2628) 跌得多啲。

　　油股航空股玩出入
　　前兩日陸羽仁形容?家嘅上落市係淺水游泳，只能在有限波幅中買賣。有中環茶友回應，喺淺水度趴趴吓游水，要有番咁上下技術，因為咁淺水，稍一不慎就會刮到損手爛腳。

　　中環茶友話，喺咁環境佢「發明」咗個「平股搖搖板」遊戲，玩過兩次都得得哋，大家有興趣可以試試。呢個搖搖板的組成有兩部份，一部份係產油關連的大股，主要係三桶油；另一部份係用油關連的大股，主要係三大內地航空股。遊戲操作原理係佢發覺呢兩個板塊有互動對沖的關係，即係你跌我升、我升你跌，故此可以買一邊、沽一邊，出出入入，頻炒波幅。好似昨日油價升，隻中海油(883) 彈上4%，佢就沽出，候低買番隻因為油價升而回落嘅東航，博遲些少油價回番航空股反彈。

　　茶友點解揀呢個板塊呢？原來仲有兩個條件，一係佢哋經常跟油價上落，波幅夠密，常常單日都有3、5%波幅，呢個亦係點解佢唔揀國泰的原因，因為國泰大大隻，郁得慢，唔容易游來游去。

　　第二個原因係呢啲都算係大股，而且市盈率唔貴。好似三桶油受油價低沉前景唔明朗，基本上都喺近年低位浮沉，而且有息派，好似中海油歷史市盈率5.3倍，有6.4%息，算係平股；至於航空股價錢唔平，但勝在受惠低油價同強美元，成本下降之餘需求仲好唔錯。兩者都有得守，減低萬一賣唔中時的炒賣風險。

　　好似隻中海油公佈第三季營運數據過後，巴克萊發表報告，認為中海油上季產量按年升24%，首三季產量升17%，同時資本開支降36%，但由於實現油價下跌，相信集團下半年純利回落，但估值就不貴。茶友話若然叫佢買中海油長揸，佢會嫌佢未夠平，但如果短炒吼住喺低位博反彈，佢就有波幅夠闊的好處。

　　二孩概念有機短炒
　　茶友話，呢類股市搖搖板，其實係市場追求價格平衡的過程，慢慢當價格趨向平衡，彈力就會消退，直至完全無力。如果愈多人玩，就愈快玩完，所以投資者要自己不時留意，自己搵搵有無新板塊替換。

　　五中全會閉幕，會上全票通過取消「一孩政策」，容許夫婦生第二名子女，個別二胎概念股份已經炒咗一轉，好孩子(1086) 收報3.5元，升半成。內地人口紅利因為出生率下降慢慢由有變無，家仲面臨勞動力減縮的威脅，今次決定應該造就不少商機，可惜係呢個板塊好股唔多，主要都係乳品股同個別玩具股。如果想炒呢類股，可能只係短炒，有機會就要快食。

　　近排好多新股掛牌，大股多數靠基礎投資者撐場。內地四大國有資產管理公司之一中國華融資產管理(2799) 今日首掛，於上市前夕，暗盤價初段已破底，暗盤開市五分鐘報2.96元，較招股價3.09元，低逾4%。

　　陸羽仁
金融High Tea 舊文