魚樂無窮：尋找下個熱炒板塊
■京能清潔能源乃北京最大燃氣發電供應商；圖為集團主席陸海軍。 資料圖片
人民幣成功入籃，中港股市發力向上，儲局月中議息會議，成為最後一個不明朗因素，只要一如預期加息，兼夾耶倫沒有驚人言論，以而家嘅勢頭，環球股市似食尾糊多過衰收尾。市況雖未至百花齊放，但一個
半個消息，亦足已推動整個板塊，沉寂一輪嘅內房股，藉著11月樓價再升以及按揭利息扣稅傳聞，強勢反彈。在港上市唯一的內房代理合富輝煌（733），仍然處於橫行區，隨時大棍崛起。
唔想向落後股埋手？不如諗諗資金下一輪部署。近日北京霧霾爆錶，市區空氣PM2.5超過安全值達10倍，真係吸啖氣半邊肺黑曬，環保概念股遲早再炒，今日推介嘅京能清潔能源（579），更屬極品中嘅XO，三大賣點逐個數。
賣點一︰瓣數多。公司乃北京最大燃氣發電供應商，另經營風力、水力及光伏發電，包辦所有新能源項目，資金搵嘢炒，第一時間諗起佢！
賣點二︰業績靚。首三季盈利收入增長93%至99.1億人仔，盈利亦升70.4%至14.2億人仔，相對中期分別升86.9%及43.7%，第三季增長明顯加快，勁呀！
賣點三︰估值平。綜合彭博券商預測，今年市盈率8.1倍，明年降至7.3倍，比起同業普遍處於雙位數字，平得可憐，一旦突破3元水平，升勢可以好兇狠，有買趁手！
唐牛
https://www.facebook.com/tongcow88
唐牛
魚樂無窮 - 唐牛 舊文