女神tea time：影業股仲有邊隻炒
■阿里巴巴早前拎到《龍櫻（東大特訓班）》的改編權，將改編成電視劇。 資料圖片
阿里巴巴早兩日拎到日本人氣漫畫《龍櫻（東大特訓班）》的改編權，將改編成電視劇，影業股到噚日終於全力起動！做上下遊星美控股（198）同星美文化（2366
）、院線股橙天嘉禾（1132）、IMAX中國（1970）齊齊彈起！今日就推介一隻有憧憬，加可追落後影業股漢傳媒（491）。內地影業公司入面，仲有一間少人留意，就係許家印旗下恒大電影。恒大電影出品作品包括範冰冰《武媚娘傳奇》，同埋彭于晏《破風》等，而《破風》更加係同英皇合作！
漢傳媒大家都知係由謝霆鋒做大股東，咁霆鋒同英皇楊受成關係咁密切，估計楊生友好都會照顧佢。至於楊受成一向同許家印老友鬼鬼，較近大刁就有恒大收購原本由楊受成持有新傳媒，家陣已改埋名叫恒大健康（708）。內地影業近年順風順水，唔好幻想咁多，話借殼呀盛，單係憧憬漢傳媒同恒大電影合作，已經夠和味。
漢傳媒目前市值得9億元左右，都未算大隻。股價7月時炒到最高1.36元，之後跟市大跌。至0.37元左右橫行，街貨應該好乾，現時三條平均線交雜，似等待爆邊，家陣個勢理應爆上機會大，以0.37元做止蝕，都抵博啦！
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文