魚樂無窮：股場上的李斯特城
■李斯特城今屆一鳴驚人，華迪更連續11場英
超賽事有士哥，破盡紀錄。 資料圖片
有睇開英超嘅戰友都同意，今年冇乜邊隊有冠軍相，但論搶鏡程度，則非李斯特城莫屬。去到球季中段，竟然可以力壓阿仙奴、曼聯、曼城等傳統勁旅，位列榜首，更出咗個土炮射手華迪，連續11場英超賽事有士哥，破盡紀錄。開季前，球迷對李斯特城關注度等於零，所以冠軍賠率達1,500倍，而家？只係得番16倍，機會可謂一閃即逝。
今日推介嘅楓葉教育（1317），正正潛藏著李斯特城的基因︰被人睇低卻潛力無限，球迷股友都要關注。楓葉去年底上市，遇著市況弱雞，一直潛水，去到大時代才翻身，但不久又遇上連環股災，再被打沉。終於，一份靚靚業績，讓火鳳凰重生。
楓葉全年收入升21%，純利更增長46%，市盈率僅15倍，卻有3厘高息，以增長股來說，絕對唔貴，公司主要在內地經營國際學校及幼兒園，食正中產崛起及二胎政策，綜合券商報告，未來數年將大力擴軍，學校規模將由今年嘅40間，增至2018年嘅62間，盈利前景無得頂！
一年時間潛水，將散戶震得七七八八，貨源盡落強者手，第二大股東紅杉資本上周以2.95元悉數沽出9%股權，但在連日跌市下，楓葉股價竟然企硬。1,500倍嘅李斯特城你買唔到，還未破頂嘅楓葉教育，大家不要再錯過了。
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com