一周三件：深控省鏡到痹
■深圳控股食住深圳內房熱；圖為集團主席呂華。 資料圖片
深圳控股（604）食住深圳內房熱，首10個月累計銷售額，講緊以倍番，省鏡到痹，加埋實力母系，大有條件獲注深圳靚地。場內有跟深控嘅券商，投資評級清一色係「BUY」。深控今年首10個月內房合同銷售額149億元
人仔，同比大增176%，兼超額完成今年銷售目標110億元人仔。仲未止，睇番場內其他中資大牌，中國海外（688）、保利置業（119）、華潤置地（1109），今年首10個月合約銷售，同比只係錄到雙位數增幅。當中華潤置地最勁，但講緊都係得36%。深控銷售增幅，係彈咗出嚟！
中線keep住肥仔水
內房回暖，特別係深圳樓價升幅，跑贏曬其他地區，深控食住地利，有運行。又深控家陣係深地土儲有2,100萬平方呎，集團對口，又係深圳市國資委。8月報載，深控母系另外亦有超過2,000萬平方呎深圳土儲資源，可以注入上市公司。深控加埋呢個超強嘅「人和」背景，中線keep住肥仔水。
場內專業評估，深控今年EPS0.4元，粗略計數，下半年EPS0.25元，比今年上半年0.14元高。又深控明年、後年，全面反映曬今年6月配股攤薄，預估EPS0.456元同0.53元，係keep住雙位數增長，兩年預測7.5倍同6.5倍PE。
深控追番上10年平均8.5倍PE，現價3.46元講緊要升30%，到4.5元。而今年中以嚟，總共7間券商follow深控，評級全部係叫買入。鬆手少少，以券商綜合平均4.86元目標計，深控講緊要升41%。後年預測9.2倍PE，都係比集團過去10年平均值，高咗啲啲。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com