金融High Tea 2015年12月4日
即買 即賣 即食
2015年12月04日
內地股市今個星期U turn回升，上證指數又逼近3600點呢個技術敏感位，應咗一個逆反心理，經上周五和本周一上午急跌後，釋放了回吐壓力，本周一人人睇淡時入貨就得米。
雖然內地股市好轉，但因為美國聯儲局主席耶倫強調12月的議息會議上大機會決
定加息，港股氣氛依然審慎瀰漫。內地股市昨日低開高走，市場人士認為，短期市場新股申購洪峰已過，明日將有2萬億「打新」資金回籠，在藍籌股連續上行、在金融大股帶動造好的基礎上，這些回流資金未來低吸創業板個股的概率更大。
雖然A股拗腰彈升，但美股杜指急吐158點，壓住港股，恒生指數收報22417點，跌62點；國企指數收報9987點，跌62點，成交縮減至665億元。
美國即將加息，近日無厘神氣的本地地產股繼續受壓，恒地(012) 挫2%，報48元，是表現最差藍籌，唯一例外係出售內地項目畀恒大的新世界(017) 倒升1%，報7.84元，成為地產股中的神奇小子。
恒大再大手掃貨
新世界之前出售酒店項目減債，?家再賣新世界中國(917) 三個城市的地產項目畀恒大(3333) ，作價165億元，新中經此交易，將得到一筆54億元利潤。新中與恒大過招，要留意係交易係兩年分期付款，恒大係先畀20%訂金，跟住火速推盤套現，實行即買即賣即食，未比尾數恒大都可以賣咗大部份出街。由於恒大在內地有強勁的銷售力量，今年賣樓隨時有1800至2000億元，食多呢批項目，都係等如1個月銷售數字而已，但港資地產商沒有這種「速銷」能力，所以沽畀恒大各有所得。消息公佈後，新中收報5.59元，微升兩格；恒大就收6.09元，跌3%，但計起恒大由9月底低位4.27元彈番上來，已升了43%，中線反彈力相當強，亦有一定炒味，屬快上快落的股票，可能回深少少又彈過。
新中現時市值485億元，賣完項目分期收番165億元，以新世界持有65%股權，幾乎可以不用現金就私有化公司，故此市場又揣測母公司會唔會咁做，不過，年前新世界曾提過私有化新中被否決，如果要做可能就要諗諗有乜新噱頭先得。
半新股方面，掛牌唔夠兩個星期的中奧到家(1538) 彈升10%，重新浮上水面，呢類物管股炒味一向濃，中奧無發展商背景，實力相對較弱，估計都係短炒居多。
年初賣咗屬下金融業務70%股權的新鴻基公司(086) 宣佈入股製藥公司，金額不多於5000萬美元，反映公司套現之後，運用資金投放喺新興行業的策略。
新證唔想玩「滴滴仔」
新鴻基公司公佈，透過屬下策略資本間接投資於以製藥、生物科技及醫療設備業為服務的公司Wuxi Pharma Tech，呢間製藥公司具有開放存取研發能力及技術平台的龍頭公司，在中國及美國經營業務。今次投資其實只佔Wuxi Pharma Tech之1.56%權益，相信係屬於被動投資性質。
今年新鴻基公司以40億元轉讓新鴻基金融畀內地光大銀行，套現後動作多多，包括在內地合組汽車融資業務，同時研究同內地金融網站合作。有熟悉集團業務人士話，過去新鴻基金融做生意，不少超微利生意，最典型係證券買賣，每單交易收「一、兩滴」，連燈油火蠟都未必夠，不如賣俾內地大行收水好過。
睇番資料，新鴻基公司的母公司係聯合地產(056) ，之上係聯合集團(373) 。聯合地產市值106億元，早前公佈中期業績都賺25.6億元，其中不少係非經常或係帳面數，但都反映佢財政唔弱。過去咁多年聯地都係中期不派息，若然末期維持派舊年同樣股息，都有3.5厘息，放長線釣魚的話，佢防守性算唔錯。
陸羽仁
金融High Tea 舊文