智取大市：人類爆煲有往績
■瑞信陶冬指未來10年地球出現「低增長、低通脹、利率及低貿易增長」。 資料圖片
最近瑞信陶冬接受某雜誌訪問話，未來10年地球出現「低增長、低通脹、利率及低貿易增長」，原因係QE時代令實體經濟遠遠弱過金融資產復蘇，分析邏輯絕對完美無瑕。講到咁長遠，上述情況發生嘅
前提，係環球各國喺10年間完全諗唔到改善問題嘅方法，悲觀劇本先會出現。人類喺絕大部份情況下，試圖解決問題，尤其係領導人級別，佢哋往往諗到比我哋凡夫俗子更高章嘅方法，引領一條新出路。所以，第一件事我選擇相信人類嘅能力。
遠嘅唔講，近嘅，就有美國人示範畀大家睇，點樣喺牌面上幾乎不可能之下，逃出金融海嘯，呢點唔重複。不過，QE當然有後遺症，眼前就係如何推動實體經濟增長，呢下難度絕對唔比應付金融海嘯為低，但對美國嚟講，係一場考驗，有機會解決，有機會拖延，雖然亦有機會失敗，但絕非絕對會完蛋。第二件事我信往績。喺過去危機邊緣之下，成熟金融市場嘅元首多數有化腐朽為神奇嘅能力，所以主要金融體系重新洗牌再建立，少之又少，近代史當中就係上世紀20年代經濟大蕭條，當時大家合力摧毀金融體系。
呢一刻，最接近自我摧毀嘅大型金融體系，就係中國，我偏向相信唔會，亦希望唔會，即使會，對全世界嚟講，唔會係世界末日。去到關鍵時刻，我信以上事情，多於邏輯。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com