大棋局：中國外滙儲備動見觀瞻
■人行早前改動一個關於中國外滙儲備報表項目。 資料圖片
上個星期提及，人民銀行靜靜雞改動一個關於中國外滙儲備報表項目，引起市場揣測係咪想隱藏某啲事。後來人行解釋話冇事，改動只係唔想市場誤讀。聽落就好似一個足球員身上跌支士巴拿出嚟，然後話
自己係汽車維修員，所以好合理叫大家唔好緊張咁。
若你早年有返內地，應記得拎錢上去要換外滙券，以前行外滙留成制度，外滙入中國要上繳，因為經歷過內戰，共產黨自己都唔信人民幣。後來中國經濟崛起，先慢慢轉為結滙制同稍為放鬆平民持有外滙限制。外滙進入中國要結滙換成人民幣，結滙幾多，人民幣就印幾多，所以人行報表有個項目叫外滙佔款，意思係呢啲外滙「佔用」咗幾多人民幣。
外滙佔款分兩隻，一隻係「央行外滙佔款」，另一隻係「金融機構外滙佔款」。前者指央行嘅外滙佔款，後者指央行同埋銀行嘅外滙佔款。所以若要知道銀行外滙佔款有幾多，將金融機構外滙佔款減央行外滙佔款就可以。
今次人行靜靜雞嘅改動，簡單嚟講就係冇咗金融機構外滙佔款，只留番央行外滙佔款畀大眾睇。人行解釋話，因為中國改革開放早期，商業銀行外滙資金主要係用人民幣買番嚟，從外滙佔款數量可以估到商業銀行揸住幾多外滙。但後來隨著中國對外開放，商業銀行外滙資金來源越來越豐富，唔再局限於購滙渠道，睇外滙佔款估資金流向容易誤讀。
入SDR後 環球央行𥄫實
人行解釋係事實，但只係事實一部份。去年中國力谷人民幣入SDR前，即係10月時，中國外滙儲備突然倒升；但過咗骨後，即係11、12月就跌凸。相對地，輪到金融機構外滙佔款11、12月跌少過央行外滙佔款。將兩條數拍埋睇，會發現當時人行好大可能玩緊遠期美元，借遠期美元嚟沽頂人民幣滙價，未到期還前央行外滙儲備表面睇落唔會跌，但到期還時會跌突。
問題癥結就係呢到。雖然官方不斷宣稱人民幣冇下跌空間，但中國外滙儲備每個月以近千億美元下跌，所有人都密切注意人民幣滙價可以頂幾耐。將金融機構外滙佔款數據隱藏咗，前述借遠期美元之類玩法，要對數捉手影則冇咁易。
曹丕打敗曹植搶奪世子之位後，同老友吳質講自己處於高位，動見觀瞻，意思係一舉一動都畀人睇到實。
中國外滙儲備，現時就係咁嘅情況。上年中國出盡力要人民幣納入SDR，係希望人民幣可以作為各國外滙儲備，屆時大量買盤可以幫手頂人民幣滙價同人民幣資產價格。但SDR新權重要今年10月先開始。
呢段期間如果人民幣大幅貶值，各國央行就計唔掂數要唔要人民幣做儲備。又或買入人民幣後突然貶值，則中曬伏。此所以點解中國係都要頂住人民幣滙價，而任何一個小動作，都會立即被人發現。
Mr. Tregunter
本欄逢周二刊出
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com