阿爺有空間就出招
2016年03月01日
二月最後一個交易日，港股跟住外圍以為有運行，點知A股低開插水，最多跌幅接近4%，搞到港股又碌低，保得住萬九點已經算唔錯。
A股上星期借住拆息升插低，昨日跌市原因一樣講唔清，有講法係內地最近催谷樓市，市場猜測投資者會棄股炒樓，資金出現轉移，所
以令大市急跌喎。睇番A股，都見到內房抗跌力真係好啲。
A股連插降準維穩
阿爺唔救市樓市，大家又話經濟差，驚銀行股市唔掂，阿爺救樓市，竟然又搞棄股炒樓的憂慮，只可以話要跌唔需要講理由。內地恐慌情緒昨日都幾緊要，滬指一度跌4%以上，午後銀行、保險、石油等板塊護盤，加上銀行、兩桶油改革發力護盤，多股反彈。上證指數收報2687點，跌79點或2.86%，深成指報9097點，跌476點或4.98%，創業板指報1880點，跌134點或6.69%。
內地股評家相信大市連插後，已經有點超賣，加上兩會召開，中央應會大力維穩，A股已經跌到幾殘，希望可以托得住。果然，收市後人行就宣佈降低存款準備金率0.5個百分點。近排人民幣匯價叫做好少少，阿爺一有個窗口就降準，否則到人民幣弱時就更難出招。華泰證券首席分析師羅毅預測，降準釋放流動性7000億左右，對股市形成正面維穩作用。
受A股急挫拖累，恒指收報19111點，下跌252點；國指跌幅較大，收報7916點，下滑117點，成交奀奀，只有640億元。以全月計，恒指累積下跌572點或2.91%；國指累積下跌325點或3.94%。
成交咁少，港交所(388) 跌贏大市，下挫2.5%，造168.9元；衰咗幾日的康師傅(322) 全日收造7.33元，跌3.68%，但匯控(005) 逆市漲0.2%，報49.65元。
內房銷售近期銷售增加，不過去年銷售成績，好多公司都係一段。越秀地產(123) 公佈去年底止全年業績，純利10.13億元人民幣，下同，按年跌59%；核心淨利潤12.4億元，按年下降21.2%，末期息1.9港仙，上年同期為2.7港仙。
內房公佈業績，市場另一關注點係外債的匯價損失，好彩越秀呢方面影響唔大。同香港地產股唔同，內房對派息傾向手緊，主要係內房財政無香港公司咁充裕，管理層寧願保留現金，用作減債或買地。
踏入業績公佈期，上市公司盈利驚喜者少、驚嚇者多，傳統上港股係二、三月氣氛比較好，炒完業績跟住炒除淨，跟住到五、六月因為消息少，基金經理少做少錯，通常係調整期。
去年市道放緩，好多行業都出現調整，最明顯係銀行。過往淨炒得最開心係銀行股，今年普遍業績麻麻，部份撐住派息，只係能夠跌少咗。另一個有壓力就是旅遊零售相關行業，昨日周生生股價再創一年新低，顯示市場對呢類股份唔太樂觀。
大台要靠簡體字搵生意
受零售業影響，傳媒股都受拖累。早前有線電視公佈虧損擴大，全年蝕二億幾銀，暫時仲睇唔到公司有乜辦法可以扭轉劣勢。稍後，輪到大台電視廣播(511) 公佈業績，有電視業大佬都預告不宜厚望。
網媒興起，開初大家以為紙媒中招，點知揭盅電子傳媒都好傷，因為消費者已唔習慣要俾錢睇電視，而且唔習慣定時定候收看，所以家就算一台獨大，無綫收視率仲係持續受壓，要不斷諗計開源。上個月無綫高清台分途廣播，普通話新聞用簡體字，結果惹起一陣風波。電視業大台話，無綫搞埋咁多動作，你估真係考慮政治咩，講到底都係希望吸客，想做多啲生意唧。稍後電視廣播公佈業績，就知道生意難做，大台都要頭痕點增收呀。
陸羽仁
金融High Tea 舊文
來源 source: http://hdfin.stheadline.com