陽春未至股先炒
2016年03月17日
商品價格喺美國聯邦儲備局議息前回軟，令股市氣氛觀望，不過港股暫時喺兩萬點有支持，恒指最多跌120點，收報20257點，下跌31點；國指收報8571點，下滑34點，成交金額587億元。
喺低成交下，場面叫做熱鬧啲係隻橙天嘉禾(1132
) 。公司宣佈引入由騰訊(700) 及萬達品牌聯手設立的北京微影，以及其他基金入股旗下的橙天嘉禾影城(中國)股權，橙天嘉禾股價爆升18%，報收0.59元。
聯儲局開會唔加息已係意料之中，焦點係對息口前景點睇，究竟係開鷹定開鴿，就影響後市氣氛。從美股呢排企喺高位，似乎相信大家都估主席耶倫唔敢講得太鷹。
地產股同樓價大背馳
從美國利率期貨判斷，市場傾向相信鴿派路線主導居多。一般而言，喺大選年聯儲局在貨幣政策通常唔會太激進，避免對執政黨造成影響，加上家美國增長唔算好強勁，照計有條件拖慢減息步伐，問題係耶倫究竟想增加對利率上調的期望管理，抑或係想保持經濟穩定。
如果耶倫今次維持鴿派本色，咁股市同商品或會彈多一浸。要留意係，市場家已逐步消化唔加息同利率向上步伐放緩的消息，所以就算耶倫係做鴿，利好作用唔知可以維持幾耐。
息口同樓價關係最貼切，好似本港地產股，由農曆年後低位，至今反幅咗唔少。龍頭新地(016) 低位插穿過80元，昨日收94.45元，回彈近18%、長地(1113) 低位38.2元，昨收47.2元，彈足23%，恒地(012) 低位37.4元，昨收46.8元，足足回升25%！
地產股彈得勁，但樓價同地價就繼續下滑，形成背馳。早一日赤柱黃麻角道官地揭標，由建灝地產(K&K)以二十八億一千一百萬元投得，被形容為「力壓」其餘十一家財團奪地而歸。其實所謂力壓，樓面呎價只係約一萬二千四百元，較市場估值下限仲要低兩成七。有人翻查紀錄，呢個價已重返十九年前水平，較富豪集團等財團於九七年奪得毗鄰地皮嘅一次投地都好經典，當時正係回歸前夕，富豪集團聯同中海外奪得這幅地王，當時每方呎地價已經逾一萬二千八百元，被視為天價。
呢個財團股東實力其實唔弱，但佢哋投地後就撞正樓市急挫，加上地皮位處山坡，需要進行鞏固斜坡工程，涉及建築費龐大，導致建築成本大增，搞到富豪同中海外相當痛苦，經此一役，中海外將重點轉回內地樓市，終於翻身成為千億巨型房企。至於富豪就休養生息多年，才重回賣地場。事隔多年後，富豪老闆羅旭瑞自爆，當年自己做公職，擔任旅發局主席，成日外出唱好香港，唱得多自己都深信不疑，於是高價投地，結果就上了寶貴一課。
唔知係咪呢件往事，故此大財團今次出價競投，雖然豪宅地早已超過九七水平，大家都仲係小心翼翼，結果爆冷由建灝地產打低其他大公司中標。據地皮得主透露，很高興能夠投得該幅地皮，認為屬合理的價錢投得，預計將會發展低密度超級豪宅，總投資額逾六十億元。他仲話集團對香港房地產的前景，特別是豪宅市場的長遠發展充滿信心。
大財團縮手 豪地現執雞價
事實上，今次投地嘅價錢同十九年前比仲要平，以前係天價，家係地價，得主算係執雞價買平地，點計風險都少啲。
如果話豪宅地價返回十九年前，咁家地產股價，至少就跑贏樓價，尤其三月呢一彈，力度都有小小超乎意料，可以話遠遠跑係樓市之前，提早炒埋美國唔加息同新盤開盤谷出來嘅小陽春！
陸羽仁
金融High Tea 舊文
來源 source: http://hdfin.stheadline.com