Dr. Money
網絡圖片
拜養和醫院所賜，一場普通的籃球比賽，竟然讓我初次體會，跟父母生離死別是什麼感覺。
長話短說，打波嗰陣，唔小心篤魚蛋，痛到 Bill Liu。如果女士唔知乜嘢係篤魚蛋，簡單講嚇：手指伸到直一直，個波跌落指頭，是籃球場上的十大酷刑之一。視乎篤得有幾嚴重，有啲人返屋
企休養幾日冇事，但我昨天真的不行，痛得前所未有，要立刻去醫院。
最佳損友 Benson 在場邊大喊：「篤魚蛋啫，又唔係省 J，使唔使咁誇張呀。」我沒有說什麼，只是抬起青白的臉看著他。兩分鐘後，我已坐上他那部「從來只是載女不載仔」的白色 GTR，向養和醫院出發。
為我診斷的是黃醫生。
他最後的結論是，要做手術，仲要係全身麻醉，盛惠八萬大元。人稱維園 Kobe Curry 的葉朗程，即是 Kobe Bryant 加 Steph Curry，竟然要因為篤魚蛋而做全身麻醉手術，當堂三魂唔見七魄。
雖然不是什麼高風險手術，但畢竟是人生第一次全身麻醉，小弟難免感性起來，想打個電話給正在歐遊的雙親。
「喂。」是媽媽的聲音。
「媽，冇乜嘢，just want to say that I love you。」
「做咩事呀？你唔好嚇我呀！」
「冇事呀。」我強忍著淚水說。「我聽日要做個全身麻醉手術，因為啱啱篤魚蛋。」
媽在那邊忍著笑，叫我睇多個醫生，攞個 second opinion。我掛線後，心裏只是希望媽媽記得我那句 I love you。話說回頭，除了養和，我還可以在哪裏攞個second opinion？香港地仲有邊個勁得過養和？「你試嚇搵謝醫生介紹個醫生畀你啦。」Benson 說。這個時候，我們已經離開醫院，去到祥興茶餐廳，作為出生入死的兄弟，他竟然還有心情在這個時候吃菠籮油。
謝醫生是全港第一的心臟科醫生，聞說也是誠哥的禦醫。Benson 當然唔識謝醫生，但佢識佢個friend，於是就搵佢介紹咗另一個叫陳醫生嘅骨科聖手。
最後陳醫生醫好咗我，只係用僅僅三秒鐘就醫好咗我，診金是五千，當然唔算平，但比起原本那個八萬大元，只是 chicken feet number。
萬分感激養和的黃醫生，沒有他，我也不會無情情地肉麻跟阿媽說了聲 I love you。有人曾笑言，經葉朗程加持過的人或物，必定會前途無可限量。咦，取笑人嘅，人哋邊有咁叻喎。但萬一我真係有咁叻，咁就一定要喺度鄭重加持一嚇黃醫生。
如果我係其他私家醫院，一定爭住請你。開一間私家醫院，都係想賺錢啫。有你呢個咁識診症嘅醫生，邊間醫院咁好彩請咗你，兩年後仲唔主板上市？
來源 source: http://thestandnews.com
生活 - 葉朗程 舊文