金手指：一注獨沽溫哥華樓
■2015年溫哥華樓價升了四成，總升幅比全市市民全年人工總和高出兩成幾。 資料圖片
神創造我哋香港人，賜嘅使命係乜？唔知？你一係九十後，一係新移民，等孫柏文叔叔同你講。就係cheap價買定啲嘢後，天價賣畀大陸同胞。轉口港DNA啊，雞唔雞？
近年，全球左膠偶像，
由冇閂關塔那摩基地嘅奧巴馬，轉為加拿大「新總理」Justin Bieber。大陸外長王毅，上周訪加記招時，係都要插咀答一個唔係問佢，問加外長嘅問題，關於大陸人權。王毅嘅答案我唔嘥字數再講。
不過，王毅「罵叉」完個記者後，加總理又要幾日後踩大陸多腳。左膠：「好型啊！」關財經咩事呢？2015年溫哥華樓價升咗四成，根據數學家Von Bergmann，樓價總升幅比全市市民全年人工總和仲高兩成幾。貴到離譜。點解？大陸人買囉。
問題喺呢到。大家喺香港，一定感受到大陸外滙加強管制，落閘唔俾錢流出後係點，2015年已見。不過點解啲錢仲可以湧去溫哥華呢？王毅呢啲咁老練嘅官員，「失控」係咪特登想搵個藉口，開始用人釘人嘅「行政手段」嚇啲大陸有錢人唔好再去加拿大買樓？等錢唔好流走？
咁又關轉口港DNA咩事呢？八、九十年代，我哋香港人喺溫哥華買咗好多樓，論價，已要放。如果中共向該市閂水喉，咁就即要一注獨沽溫哥華，快賣畀啲愛國同胞啦！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com