智取大市：
先翻兜騰訊再揀蟀
■騰訊突破上升旗形創上市新高。 資料圖片
上次講到上周五有龍尾股跑贏龍頭股嘅跡象，要減持避險，不過，星期一返到嚟，大市未見調整，龍頭股騰訊（700）仲要突破上升旗形創上市新高，似乎一浸短炒周期嘅完結，已經代表另一浸升浪嘅開始。小弟惟有安慰自己，減持當畀自己
執倉嘅機會，睇清楚邊啲股強、邊啲股弱，好讓注碼集中喺上升動力強勁嘅股份。
6月份投資者齊齊驚英國脫歐、美國加息等等不明朗因素，但市況咁都跌唔落，唔通要等一切明朗化先嚟衝？上星期五非農數據淡化美國6月加息嘅機會，之後英國脫歐公投，斷估英國人去到投票一刻，都未必咁勇武齊齊響應脫歐，因此相信6月兩大不明朗因素最後武士機會大。
所謂不明朗因素，一直令投資者舉棋不定，變相推遲市場消耗購買力嘅時間，直至英國脫歐公投之前，終極購買力都未湧出嚟，反而有機會為股市帶來蜜月期，直至一切明朗化後，就有可能由一批如釋重負嘅投資者入場高位接貨，或許到時先係出貨好時機。
由最強股份開始買，騰訊先破頂冇走雞，機會唔等人，次選應該係科通芯城（400），都係嗰句，之前溢價配股，大股東肯寫包單接貨，幕後必然把握任何機會炒高，所以呢一轉好難少佢一份。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com