炒留歐 留一手
2016年06月07日
美國就業數據遠低於市場預期，令6月份加息機會急挫至接近零，家焦點係聯邦儲備局仲係好想加息，但究竟7月有無力加呢？
陸羽仁同財經猛人傾起，佢原本係對美國加息看高一線，但就預咗本來美國都好有可能係喺6月份觀望一下，皆因月底英國會就留歐脫歐進行
表決。現時牌面睇留歐機會雖然較大，但若然脫歐，必然會引起工業國家的金融震盪，為穩陣計，聯儲局都係保持低息，等英國公投完成至算。
英國就留歐脫歐玩公投，呢次係自蘇格蘭獨立議題後另一次公投。
上次首相卡梅倫打告急牌，成功擊退「甩蘇派」。呢次脫歐公投，佢原來嘅政治盟友、前倫敦市長莊遜(Boris Johnson)突然出招變成脫歐派，睇嚟呢個肥仔前市長想孤注一擲，若脫歐成功就挑戰首相寶座，令到呢次投票成為佢同首相卡梅倫對決。由於倫敦市長已改選，留歐派兼係伊斯蘭教徒簡薩迪(Sadiq Aman Khan)勝出，令留歐聲勢大振。
卡梅倫會做大喊十
估計英國首相卡梅倫喺公投前，就繼續打告急牌，以防陰溝翻船。
最新民調顯示，留歐嘅民意支持度輕微領先脫歐，金融猛人話，除咗商界，家支持留歐係年輕人居多，主張脫歐嘅反而係年紀稍大一群。長者唔想留喺歐盟，除咗因為怕歐洲難民湧入現實問題，仲有懷緬大英帝國昔日稱雄的心結，唔想做普普通通的歐盟一員。年輕人心態已經習慣英國喺國際唔再係一流大國，欣賞留喺歐盟得到的便利，所以令到留歐機會「秤先啲」。
美息乏力係短炒主題
由於英國脫歐呼聲一度高唱，令鎊價兌港元跌到去11元水平，部份同英國生意往來較多的企業好似匯控(005) 股價都受壓，連長和副主席李澤鉅喺英國電訊生意併購建議被阻後，都話焉知非福，因為留歐脫歐都係一半半機會唧。不過，經過一輪發展，鎊價已經隨留歐呼聲增加上番。
有想買番啲鎊用嚟俾仔女讀書或旅行的中環茶友，就話先前錯過買平鎊嘅機會喎。不過，就算留歐機會大，以卡梅倫嘅大喊十作風，喺投票前佢都隨時再製造驚嚇氣氛，確保選民唔會懶得投票，屆時鎊匯同埋相關股票或者又會插一插，帶來執平貨機會，反正家個市咁亂，要買嘢點都係留一手，等到價錢平先郁手啦。
美國上周五公佈的非農數據遠差於市場預期，市場相信聯儲局加息機會低，但港股高開24點報後就掉頭下跌，最多跌107點，低見20840點。直到午後才收復失地，尾市升穿兩萬一，恒指收報21030點，升82點；國企指數收報8865點，漲55點，成交金額519億元。收市後中銀香港(2388) 總裁岳毅表示，母行中國銀行(3988) 已準備將六間東南亞銀行資產轉移至中銀，預計今年底前完成資產注入。他強調現時東南亞有不少建設項目都對銀行有利，例如公司貸款及個人金融業務等。
在美國加息乏力嘅主題下，本地地產股同金礦股趁勢發威。長實地產(1113) 升1.9%造50.25元；信和置業(083) 升1%造12.2元；九倉(004) 獲美銀美林上調目標價，股價揚5.2%造45.55元，為表現最叻的藍籌股。
金價急彈至1240美元關上，推動金礦股造好。招金(1818) 揚5.5%造6.96元；中國黃金(2099) 漲5.6%造13.52元；紫金(2899) 升4.5%造2.33元；靈寶黃金(3330) 升2.1%造1.47元；SPDR金ETF(2840) 升2.4%報922元。
由於短期加息前景改變，人仔昨日回彈，人民幣兌美元收漲207點子，報6.5648兌1美元，唔排除個市會輪流炒，本港地產股炒完，炒吓內房股都唔奇。
陸羽仁
金融High Tea 舊文
來源 source: http://hdfin.stheadline.com