【不問價追】萬達第二梯隊（小炒王梁心欣）（第84期）
2016-8-7 18:00:34
早排在電視度講美股，兩隻我親身買入嘅美股我都先享用其產品，等自己有個概念兼覺得賺到錢先至投入金錢，結果兩隻都賺緊錢。咁好自然，小炒王就將呢一種概念套入港股度，慢慢發掘潛質股。
兩隻美股
，一隻係關於網上購物、另一個係Facebook，仲有一隻係朋友介紹嘅調味料股（呢隻未買，走咗寶）。三個產品我自己都親身試過，再將資金擺落去，我自己就覺得幾湊效。
好似早排去咗間餐廳，呢，Gordon Ramsay在香港首開的餐廳，Bread Street Kitchen，由於廚神之名，搞到我book咗成個月先去到。餐廳好有英倫風，我心諗，邊間公司咁勁搵到Gordon參與？幾有gimmick。點知佢原來隸屬一個飲食集團，一共有20幾間食肆，連我食過的BLTburger都有份。你都可以搵下邊間你有食過。（Lupa、Mamasan、Le Pain Quotidien、London House、BLT Steak，仲有Bombay Dreams）
今次主題唔係講飲講食，係呢間公司咩人持有？原來係有「國民老公」之稱、萬達王健林個仔王思聰揸住，難怪集團大部份餐廳都好有英國特色，事關王思聰的中學同大學都在英國讀，唔多唔少對英國都有分回憶。而呢間飲食概念（8056）又咁啱來香港上市，8月5號正式掛牌。飲食概念唔係王思聰直接持有，而是透過其私募基金購入的一批可換股債券所持有，佔公司上市後10.11%股權。
從英國回來後，王思聰擔任萬達集團的董事，但並不負責任何事務。之後佢就成立咗一間基金公司「普思投資」，開頭用5億人民幣投資咗環球數碼、雲遊控股、九好集團同埋無錫海古德新技術有限公司，照睇都係鍾情科技，今次落戶飲食，令我不其然諗起萬達的院線！有戲睇有飯食根本就是一條龍服務，老遠來香港搞飲食，絕對唔似會低調，而係想闖關，打造另一個飲食王國，仲要走high-end路線。
在創業板上市可能是第一步，以集團集資額9000萬元計，公司市值即係3.6億。王氏父子的實力唔止3億幾市值，純計算佢將來擴大版圖之餘再和院線有聯繫，主板之日距離不遠，大家不妨在上市初期多加留意。
不問價追 - 小炒王梁心欣 舊文
來源 source: http://www.winmoney.hk