陸羽仁 BLOG 2016年8月8日
地產股受壓
2016/08/08 09:29:46
網誌分類: 經濟
美國上周五公布7月非農就業數字，異常靚仔，新增職位25.5萬個，遠高過市場預期的18萬，失業率維持4.9%，而己公布的6月新增職位則由28.7萬個上調至29.2萬個。美國7月平均每小時時薪較去年同期增長2.6%，與預期一樣。
由於就業數字出乎意料之外強勁，馬上令到市場對聯儲局加息預期提升，利率期貨交易數字顯示，市場預期美國於9月加息的機率，由非農就業數字公佈之前的9%升至18%。
蘇格蘭皇家銀行表示，如果聯儲局選擇年內加息，12月加息的可能性要大於9月份，但仍然預計聯儲局今年年底前加息的概率低於50%；債王格羅斯則表示，資料顯示美國勞動市場有良好增長，估計聯儲局將在12月加息一次。他認為聯儲局必須增加聯邦基金利率，否則金融機構將受損害。反映市場普遍認為聯儲局今年年底才會加息的機會比較高。
正路聯儲局面對如此強勁的就業數字，9月加息都唔奇。但考慮到美國即將舉行總統大選，不確定因素太多，估計聯儲局主席耶倫較可能唔想添亂，惟有等到大選過後，睇睇到時環境，如果經濟數字配合的話，就會加息。
美國今年加息機會雖然大增，但就業市場數字顯示經濟狀況唔錯，成為推動美股上漲的一度強勁催化劑，令已經在高位呆滯咗好一段日子的美股有番起色。杜指上周五升191點，收報18544點，升幅超過1%，與歷史高位只差約50點；標普500指數升19點，收報2183點，升幅0.9%；納指升55點至5221點，升幅1.1%，標指、納指同上高位。
上文提到格羅斯提到加息對金融股有利，但銀行第二季度的收入狀況，值得留意。金融海嘯以後，政府對銀行的規管越來越嚴，再來一個英國脫歐，令到市場投資情緒變得更加謹慎，第二季多家主要投資銀行的股票交易收入都好慘淡。歐洲投行更係重災區，其中香港人最熟悉的?豐銀行第二季股票交易收入較去年同期就驟跌超過五成！美國前五大銀行表現最差的，則是高盛當季股票交易收入下滑12%，歐美11家大銀行，只有摩根大通有所增長。至於亞太區市場亦唔好得去邊，其中瑞信的亞太市場股票銷售和交易收入就較去年第二季大減39%。結論係銀行股暫時仲係捱打，要到真係加息才稍見曙光。
銀行股未到大炒時，地產股亦唔見得好旺。最近發展商狂做二按招客，不少盤加埋二按做到95%借貸，最誇的甚至加另一間樓按落去做到120%借貸借到突。
金管局睇唔過眼出招，鬱唔到地產商，就向銀行施壓，俾問券銀行，要銀行答現時就有關貸款、計算資本要求時所採用的風險加權資產（RWA）權重（Weighting）水平。
銀行業估計，金管局想將被視為高風險的地產貸款，要求銀行提高相關對地產商貸款的權重要求，增加銀行資本成本，推高有關貸款息率。業界認為有關措施即使實行，但作用有限。
不過金管局此舉亦顯示政府和金管局對樓價咬住唔放，加上又有加息陰影，會影響地產股投資氣氛。
陸羽仁
回應(0) 我想回應
陸羽仁 BLOG 舊文
來源 source: http://blogcity.me