金手指：
給你千二公頃土地
■船灣淡水湖佔地約1,250公頃。 資料圖片
搵地，好難。因一，要夠大；二，不可未開發（得番啲郊野公園），即要棕土；三，不可私人有份擁有（因收地賠款時，會益咗某某啲「家人」，或《竊聽3》人物）；四，不可有人住（橫洲、馬屎埔、菜園村）；五，要平；仲有留古樹、
古蹟，同埋唔可以填海，所以令現今公共政策持份者全線投降，因答案要超model answer。
孫柏文有冇計？有，塊地符合以上五個條件，千二公頃，相等於兩個油尖旺咁大。不過攞呢塊地前，政府要將之前已宣佈提供一成香港食水嘅鹹水化淡計劃，產能倍升至兩、三成。
塊地喺邊？咪就係將船灣淡水湖啲水泵走，就會浮現出千二公頃。棕土、百分百政府擁有、冇人住，全中。點解要加倍鹹水化淡先？因今日香港最大政策力量，就係中港矛盾，東江水係主要源頭。轉水塘用途，變「大陸人買曬」嘅私樓同「新移民攞曬」嘅公屋，如先鬱（邏輯上全球有最大誘因提供土共維穩奶水嘅）粵海（270），會易推好多。
你可能問：「咁勁又唔見政府搵你？」原因係計仔太有英帝天馬行空味。試問今日嘅官員如返六十年代，面對人口大幅膨脹，要穩政治控制下放傳染病，如何增加食水保衞生？（亦解釋點解必需品中得水有殖民政府補貼）會唔會將成個船灣用三個提壩封起，泵走海水後儲淡水？定係學𠵱家咁，呻「粒粒皆辛苦」下死守填鴨式答案，盡力當解決。所以各選委要啲政策鬱，千其唔好投畀啲填鴨味濃嘅人。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com