績優股當造
2017年02月21日
二月份全球大部份股民都好開心，連本來無乜運行嘅港股都升多跌少，昨日恒指又再報升，再造出24146點近一年半高位。美股呢排節節高升，令美國人同全球股民感覺相當唔錯。
既然大家覺得世界咁美好，聯儲局就唔怕出嚟嚇吓人，由主席耶倫以下嘅高層都出嚟放吓鷹
，令到三月份美國加息機會由極低變為低，即係應該唔會加息，但都不能排除可能性，後續仲要睇有無好強勁嘅經濟數據出現。
雖然美息上調步伐漸近，但市場人士仲係相信三月份唔加息嘅多啲。中銀香港(2388) 發表最新經濟報告指，美股在特朗普當選後一直維持在高位，但經濟仍處回穩階段，過早加息不利經濟現況，或可能阻礙其增長勢頭。
更重要的是，歐盟在未來三個月將接連出現多個重大事件，包括荷蘭大選、英國啟動脫歐、法國大選、希臘債務問題等，使區內的經濟及政治風險提升，這由法德兩國的10年期國債息率持續擴闊可反映。
中銀料美三月不加息
中銀認為，目前美國通脹壓力仍可控，聯儲局無必要急於在3月加息，料6月加息較為合理。至於加息步伐，加息三次的可能性開始提高，但考慮到能源價格的低基數效應將於今年第二季逐步消退，加上工人平均時薪的漲幅有收窄的跡象，這些因素將可緩和全年的通脹升勢，所以全年加息兩次的機會仍然較高。要留意係如果個人消費者支出指數(PCE)， 及核心PCE在未來數月持續高於2%以上，咁就可能有需要加息三次。總括而然，美國已經進入一個長期及循序漸進的加息周期，投資者需要為加息預期升溫、強美元及美債息率上升所引發的風險及波動做足準備。
今個星期大市重頭戲係滙控(005) 、友邦(1299) 等藍籌股於本周公佈業績，加上市傳內地養老金有望於本周入市，港股高開32點，中段回軟後下午又好番啲。恒指收報24146，漲112點；國企指數收報10445，漲85點，成交跌番去781億元。
藍籌股普遍向好，將於今日公佈全年業績嘅滙控，股價升1%，報69元。市傳內地養老金有望最快於本周入市，加上開始放寬散戶買賣期指張數，部份券商股造好，天順證券(1141) 升5%，報0.235元；西證(812) 升2.6%，報0.395元；中國銀河(6881) 升1.4%，報7.85元。
晨鳴豪加一倍息
內企公佈業績，過去幾年大陸經濟下滑，令企業汰弱留強，效應係個別行業開始出現，當中包括紙業。大企晨鳴紙業(1812) 公佈截至去年全年度業績，盈利利為20.64億元人民幣，同比勁升102%；每股基本盈利0.99元，市盈率即時跌到唔夠十倍，而且末期息都同步加料，去到0.6元人民幣，睇嚟管理層信心相當不俗，加息之餘仲唔係以特別股式派發。公佈後公司股價造好，新報10.02港元，升6.7%。
晨鳴過去半年表現其實都幾靚仔，股價由低位5元拾級而上，昨日升幅已達一倍，衝破左10元大關。內地紙業在早幾年因為產能過剩盈利急挫，經過一輪淘汰賽，行業狀況改善，開始進入上升循環，睇番佢過去幾季業績，純利已經大幅增長，估唔到係佢嘅派息咁慷慨，係盈利同派息大增下，市盈率跌回10倍多啲，息率則有5厘幾，數字上仍有吸引，但由於之前累積左獲利回吐嘅壓力，唔排除會有好消息出貨。由晨鳴嘅例子睇，內地個別行業開始回升，帶動相關企業嘅盈利，所以績優股當造，二、三月業績期會有得炒。
陸羽仁
金融High Tea 舊文
來源 source: http://hdfin.stheadline.com