魚樂無窮：揭爆升背後玄機
■信佳主打電子音響產品及寵物產品業務。 互聯網
空穴來風未必無因，股價異動好大機會有消息跟尾，若然高位企硬不肯回頭，則可信性更高，資金不騙人嘛。今日推介嘅信佳（912），乃活生生嘅例子。
信佳屬典型冷門工業股，平日買賣兩閒，但上月底突然一棍爆上，成交創多年新
高，然後持續在高位橫行，究竟有甚麼好消息跟尾，做完一輪功課，我搵到三大可能性。
第一，業績亮麗。公司主打電子音響產品及寵物產品業務，中期盈利平平，微升2.8%，但寵物業務中食品及社交程式進入收成期，由於毛利較高，全年業績絕對有睇頭，現價市盈率僅9倍，未反映真實價值。
第二，特別派送。信佳今年成立25周年，極具意義，回帶睇番5年前20周年，公司派發特別息每股8仙，假如歷史重演，連同常規派息，息率高達9厘，聽見都流口水。
第三，分拆上市。管理層不止一次講過，只要寵物業務成熟，便會分拆上市，信佳最新市值7億銀，NAV水平相若，一旦分拆落實，釋放價值無極限。
一句到尾，上述三個可能性都係靠估，但在冇蟹貨以及靚靚數字配合下，小注等收成唔慳得。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com