笑到最後：
「逆維穩」風險增加
■香港回歸20年，「七一前維穩論」越吹越大。 資料圖片
上半場恒指升4,000點，但股份側重個別科技股，所以最多只可以話係小時代。喺呢個小時代入面，強者越強，但係近期「七一前維穩論」越吹越大，反而令高明對後市有啲擔心。
「七一前港股維穩論」最先出自彭博
，文章5月11日發佈，出文後港股最多升近千點至26090點。不過，以維穩角度，截至上周五就唔算太成功，因為港股頭5個月都以升市結終，反而「維穩月」6月出現明顯調整，至今僅升9點，當然唔排除今個星期會有神力出現，但以技術指標超買嚴重計算，冇神力由佢調整，比起夾硬托市嚟得更健康。
股市維穩論喺香港幾乎年年有人唱，例如年頭開兩會前必定有人話中央托市，撇除呢啲年年唱嘅例牌維穩，每隔一兩年都會有大事發生唱穩穩論調，2013年至今起碼有三次，分別係2013年三中全會前、2015年A股股災、2015年年底五中全會前。
2013年三中全會前，本地親中傳媒於9月至11月期間開始發出有關維穩論，指中央經濟正面政策有機會出台，預期對港股將會帶來正面影響。事實上，2013年港股從6月低位至11月開會升4,000點，維穩後12月兩萬四見頂，翌年1月由高位跌近兩千點。
2015年A股股災，騰訊網7月8日引述消息報道指，應中國證券業協會的要求，7家券商將著手維穩H股股價。港股即月反彈逾千點，橫行半個月後，8月再跌近4,000點。
2015年年底五中全會前，本地傳媒再傳維穩之風，今次係成功托市例子，港股由9月低位20368點，一直托至開會日10月26日23424點見頂，但由於股災持續，至翌年初跌穿19000點先見底。
大致上，傳出維穩論後，短期的確托得起，但之後會跌得更甘。事實上，今年港股形勢大好，根本唔使托都會升，維穩論反而令七一後有「逆維穩」風險。
高明
http://www.fb.com/bigricetea
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
高明
笑到最後 - 高明 舊文
來源 source: http://hk.apple.nextmedia.com