中環在線：任總變孔劉
陪妻遊《鬼怪》場景
行會成員兼林鄭「金融支柱」任志剛，上星期重啟停寫5年嘅網誌《觀點》，頭炮曲線轟前財爺過去10年係守財奴，隨即變身「惹
火尤物」，引發四面八方狠批。佢噚日發表第二篇網誌，暫時唔講財經財赤等「重口味」課題，改行輕鬆路線，孔劉上身，放閃陪太座加國朝聖，訪韓劇《鬼怪》拍攝朝聖地－－紅色「隨意門」。
嘆未能還原劇中紅葉
話說5月底，任總仲未就任行會成員前，就趁做完回歸廿年訪問，同愛妻葉小慧去加拿大探親兼旅行。佢噚日就喺網誌，憶述初夏與太太到加拿大魁北克市旅遊，尋找劇集拍攝場景，仲上載數張風景圖片，任總輕嘆此行「可惜不是秋天，未能拍到劇集中的紅葉。」
眼利網友，一看就指網誌上載嘅圖片，係韓劇《孤單又燦爛的神－－鬼怪》（簡稱《鬼怪》）拍攝場景地點。
呢齣開播後話題性超越《太陽的後裔》嘅韓劇，由37歲黃金單身男神孔劉，夥拍金高恩主演，雖然係「大叔」與小女孩組合，但甜蜜互動居然閃盲劇迷眼球。
劇中鬼怪角色，可以喺屋企隨意打開一道門，就能穿越阻隔，去到另一個地方，有啲似叮噹「隨意門」，其中一道穿越後打開嘅門，就係任總影嘅加拿大粉紅小門嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com