管理層要睇股價包生仔
2017年08月11日
港股升到兩年高位徘徊，一直搵緊理由調整，前晚美股收市微跌，連續兩日回調，港股昨日開市就插，一度插咗四百幾點，收市雖然好番啲，但都跌咗成313點。
北韓危機震散恒指
北韓局勢轉趨緊張下，大市先升後跌，恒指輕微高開34點，報27791
，已為全日高位所在，其後受匯控等金融股偏軟拖累，最多跌490點，收報27444，跌313點；國企指數收報10782，下滑180點，成交金額1220億元。九倉於周四回吐，股價急插7.03%報74.05元，成跌幅最大藍籌股。
大市調整嘅理由，主要係地緣政治風險急升。美國總統特朗普早前向北韓喊話，聲稱對佢發展核武忍耐快到極限，會發出前所未有嘅怒火。
北韓對呢番話嘅回應，就話會認真研究用核彈頭射向美國海外屬地關島。
北韓講到會打核戰，仲咁具體講埋關島呢個地點，金融市場點都要畀啲反應，金市發揮資金避險作用，金價回升，升幅超過1%，觸及差唔多兩個月來高位。
股市借北韓危機調整，政治市向來最難估，牌面睇北韓雖然話有長程導彈，但喺美國導彈防衛系統保護下，要打關島唔係咁易，亦都無乜必要胡亂開打。
換轉講美國係好唔順北韓，但鞭長莫及，盟友南韓同日本又投鼠忌器，特朗普要郁北韓一樣唔易，大家都係老吹。
雖然個市氣氛短期仲會緊張，造成調整壓力，真正打將起來嘅機會仲係好細。
近排升市唔係隻隻股都升，有中環茶友形容，呢一浪股份升唔升，都好睇大股東有無主觀能動性。茶友咁講，主要係講起日前我講大酒店(045) ，話佢資產雄厚，但股價冇得炒，因為大股東無意賣盤，又無諗辦法反映公司價值，咁股價咪唔郁囉。
特朗普同金正恩聯手送驚嚇，公佈業績嘅中移動(941) 就送驚喜。佢上半年純利增3.5%至626.75億元人民幣，每股基本盈利3.06元人民幣，建議派發中期息每股1.623港元，同時再因為上市20周年派特別息3.2元，總體派息高過盈利。
中移派特息有掌聲
中移動手頭大把銀紙，加上係現金流生意，巿場一直有聲音叫佢派多啲息，但上次年結時都無派特別息。
不過呢次卻嚟個180度轉變，順應民情，有係佢股東嘅中環茶友即刻讚佢做得好，話公司估值高低主要靠盈利能力，滾存太多資金閒置喺股價上好難反映出嚟，根本係浪費，好似中移動咁主動釋放價值，先係管理層負責嘅表現。
喺好消息下，中移動股價逆市升咗2.7%，收87元。
上市公司管理層要公司賺錢，另一個責任就係做到反映公司嘅價值，同股東分享成果，簡單講即係睇埋股價，唔止管好公司，仲包埋生仔，至少做到派吓錢，而唔係一味好官我自為之。
九倉主動反映公司價值
茶友講嘅另一例子，就係周三爆升嘅九倉(004) 集團，佢股價急升，主要係炒佢分拆九倉收租物業嘅消息，若然計劃成功，咁獨立出嚟嘅收租公司有番咁上下規模，剩低九倉嘅發展物業又值咁上下錢，咁咪變成一加一等於三囉。
當然，呢條數人人會計，做唔做到就見仁見智，因為而家好多賣樓股，其實都有好多收租物業，佢哋市盈率依家只係十倍、八倍，未來仲會盈利大增，秤資產都有好大折讓，所以如果九倉分拆收租物業，市值點估值，股價有幾多折讓，係成個大計嘅關鍵。
茶友話，九倉嘅如意算盤係咪打得響唔知，但如果管理層覺得無謂搞乜都唔做，咁股價實無得郁，依家好多地產公司嘅大股東，都無好似九倉咁發揮嘅自己嘅主觀能動性，諗計令股價反映公司價值，小股東都只能講句無奈，所以九倉呢一年股價升得勁過其他同級公司，唔單止係佢家底厚、資產靚，而係大股東有個主觀意願想股價可以反映到公司嘅價值。
其實，依家地價咁貴，好多賣樓股唔想冒險投地，咁考慮動用手頭嘅錢，至少派吓高息或者回購，咁股價先有生氣㗎，呢樣嘢小股東去股東會就應該出吓聲，督促吓公司，為自己爭取權益，唔好掛住一味攞禮物同搵食先得㗎。
陸羽仁
金融High Tea 舊文
來源 source: http://hdfin.stheadline.com