中環在線：唐家成：證監新舵手最好已退休
證監會主席唐家成（圖）將會喺一年後退任，噚日佢出席活動後就話，下任主席人選將會由政府全權負責，但自己就覺得基於利益考慮，認為「新舵手」由退休人士出任較為適合，因為唔使避席咁話。
唐家成2012年接替方正做主席時，都係退休人士，之前佢係畢馬威
中國主席，咁啱上任主席方正都係會計界知名人士。
相比起來，唐家成算係高調，過去5年，佢多次為「同股不同權」，仲有上市監管架構改革等問題，同港交所（388）熱議，雙方高層間唔中球來球往，家陣事情先至算係告一段落。嚟緊又要推行實名制，證券行要花錢改系統，唔知證監會唔會俾人嘈呢？不過嘈都冇用，香港要緊貼內地要求，實名制一定推行㗎喇。
話未有心水人選
按慣例，證監會主席一任3年，冧莊一次，最多做6年，方正之前，對上一屆主席沈聯濤就做咗7年，當時有傳係搵唔到人選。雖然話唐家成做到明年就夠6年，問佢有冇心水人選，佢自己就話未有，不過又補多句，指證監主席一職都係由政府決定。如果係咁講，可能都要問番林鄭四大金融支柱有乜心水推介先得嘞。搵唔啱咪請唐家成再做多年囉。
李華華
MAILTO:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com