金手指：舊經濟武士復仇
■現時大環境係科技公司每一環都要自己做，正如亞馬遜宣佈話要做埋物流、送貨，搞到UPS、聯邦快遞股價即插。 資料圖片
大約一個月前，當啲中期業績出到七七八八，孫柏文見到造掛上電訊鐵塔天線嘅摩比（947）盈利跌咗八成之後，因同時簽新一代天線大單成中移動（941）
最大天線供應商，所以叫咗大家「一注獨贏摩比」。
推介前收市1.31元。跟住篇文出街嗰日，開市1.36元，一支大陽燭咁上到1.52元收市。而之後真係開始有好多關於內地做5G嘅新聞，咁禮拜一摩比最高見1.74元。即如果你好聽我話推介日開市不問價追，咁就兩成半。都話最緊要聽我話！
其實如果你造嘅產品真係一個科技嘅必須品，而你嘅產品真係品質領先，就算周期唔啱，最後都會大升。因為睇大環境，啲科技公司好似要做曬，每一環都係佢哋自己做。內地係點，大家都知，連落後世界嘅美國，都突然有亞馬遜宣佈話要自己做埋物流、送貨，學曬阿里巴巴，搞到UPS、聯邦快遞嘅股價即插。
現時最多人問嘅問題，就係仲有啲乜會被科技、電腦、機械取代，最新有人工智能取代律師做功課，又有自動薄餅startup籌5,000萬美元。好快，科技公司就會你未急前，已知大家每日幾點要大便。Actually，佢哋已知，不過未諗到點monetize，所以未推。
不過，如果我同你話，有個戰場，十幾年前已經話科技贏咗，啲舊公司已死，未斷氣嗰啲都會就快，有轉勢跡象。而行內之前捱打嘅舊世界公司，啲股價仲係反映死亡。係咪好有趣呢？下周再談。
孫柏文
獨立股評人
fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com