慢牛又要唞
2017年10月10日
超級黃金周結束，A股復市微升0.8%，港股之前已經偷步大升，周初復市就回復慢牛本色，實行唞唞。
A股復市僅有小升
內地領導層換屆在即，下屆相信重點之一係推動大灣區發展，所以區內規劃不斷調整，有地嘅企業更加要諗吓點樣善用資源。招商局港口(144) 披露，廣東省已開始研究
珠江流域港口整合的各個方案。報道引述前海蛇口自貿片區人士指出，招商局集團未來將加強深圳媽灣片區發展，上月底和前海管理局合作發展樓面積500萬平米產業新城，是目前深圳開發及規模最大的綜合項目。呢個項目是由招商局集團發展，招商局港口去年已經達成協調，與集團公司成立深圳前海合營公司，佔14%共同開發及管理招商局集團所持位於深圳前海的土地的各種權益，即未來也可以分享媽灣片區的成果。另外，早年公司在建設西部港區之時，由於規模較細，所以引入其他投資者一起發展；在過去幾年個別港區例如赤灣港便與招商局港口存在同業競爭的問題，但招商局港口也一直尋求解決同業競爭問題，最新安排是在2020年9月中解決。
大灣區發展，深圳龍頭角色會加重，當中前海方面會大力起動。現時深圳土地資源日益緊張，所以在當地有地嘅國企都諗緊點用。好似有地喺前海嘅深圳國際(152) 就同前海共同開發，所以股價以慢牛式攀升，昨日佢報15.64元，叫做逆市企穩。招商局港口雖然有好消息，但股價跟隨大市回調，收報13.9元，跌左1%。佢有唔少資產，但股價幾時反映，好受市場氣氛影響，只適宜用候低吸納慢慢煲嘅心態去買。
內地A股喺黃金周後復市，投資者有一定期望，結果滬深兩市早盤雙雙大幅高開，滬指開盤即站上3400點，但高開低走，滬指3400點得而復失。上證指數收報3374點，升25點。深證成指收報11264點，升177點；創業板指收報1889點，升22點。A股升勢唔係咁驚人，港股借勢整固。
恒指低開，早段曾短暫倒升，最多升30點，高見28488，已為全日高位所在，其後反覆向下，最多跌176點，低見28282，恒指收報28326，跌131點；國企指數收報11385，下滑73點，成交金額978億元。港股升左咁多期突破埋大時代水位，回調鞏固下反而減少左升得太急嘅憂慮，所以市場氣氛都仲係幾平靜。
資金跟住市道炒內需
藍籌股周一普遍下跌，唯獨港交所(388) 追落後，逆市升1.57%報220.6元；滙控(005) 收升0.19%報77.5元。另外資金跟住黃金周嘅經濟表現走，由於大陸消費唔錯，多隻內需重磅股造好，萬洲國際(288) 升0.84%報8.42元；蒙牛(2319) 升1.59%報22.35元；恒安(1044) 升4.67%報78.4元；旺旺(151) 升6.07%報5.94元，為表現最佳藍籌股。至於澳門於黃金周期間訪客按年增一成，惟多間大行對澳門整個10月份博彩收入並不樂觀，多隻濠賭股乘機回吐，永利(1128) 跌4%報19.66元；金沙(1928) 跌2.7%報38.55元；新濠國際(200) 跌2.2%報21.8元；美高梅(2282) 收跌2%報17.64元。
內地樓市十一黃金周交投按年下跌，「銀十」效應不再，內房股偏軟，奧園(3883) 、雅居樂(3383) 跌7%；百仕達(1168) 跌6%報1.41元；融創中國(1918) 跌5.4%報38.6元；龍光地產(3380) 跌4.3%收報8元；恒大(3333) 跌3.5%報收29.15元。金九銀十嘅內房銷售季節成績麻麻，內房調整係預期之內，之前佢地炒得又急又快，調整起來力度自然預計都有番咁上下啦。
陸羽仁
金融High Tea 舊文
來源 source: http://hdfin.stheadline.com