操盤手劄記：十九大炒股啟示
■十九大勢將進一步確立習近平思想，實現國強民富嘅中國夢。 資料圖片
特首林鄭月娥首份施政報告出爐，重中之重係房屋政策，但首置上車盤冇乜細節，農地換地仲係無米粥，地產股即散水，拖累恒指掉頭向下，主板成交增至1,123億元。跌市成交增，後市要小心！
講開
上車盤，中大調查顯示，港人要14.5年唔飲唔食，先買到個300幾呎嘅上車盤。樓價貴到咁，仲爭住買樓，係咪非理性行為？真係要問嚇今屆諾貝爾經濟學獎得主──行為經濟學祖師塞勒（Richard Thaler），佢曾經喺講述次按危機嘅電影《沽注一擲》（The Big Short）客串，對樓市自有見地。
香港樓市唔係只升不跌，回歸20年嚟，曾經6年之間跌近70%，之後反彈4倍，20年累計仍升60%。今個月天字第一號大事係美國開始縮表，而且12月、1月加息高唱入雲，香港喺聯繫匯率下亦會跟隨。加息、縮表疊加嘅負面效應，隨時再拖跌樓市。
中共「十九大」下周三召開，內地股市早已進入維穩行情，滬指連續28個交易日升跌唔夠1%，有穩步上揚之勢。十九大焦點係中央高層執位，未必有重大利好政策。不過，對股市點都有啟示。
十九大勢將進一步確立習近平思想，為實現國強民富嘅中國夢，民生方面，必會更重扶貧、環保；經濟方面，必會深化市場改革、開放。喺汰弱留強下，行業龍頭嘅業績可望加速增長。換言之，揀股要揀龍頭，我繼續睇好內地重型卡車龍頭之一中國重汽（3808）。
由於環保要求提升、超載監管加強，內地重卡出現換車潮。據第一商用車網統計，內地重卡銷量連續4個月創新高，9月銷量達10萬輛，按年增89%，按月增7%。重汽9月銷量1.68萬輛，按年增98%；首三季累計銷量14.87萬輛，按年增80%。重汽連續兩日破頂，現價12.22元，升2.17%。該股半年多賺4.8倍，喺銷售刺激下，第三季業績看俏，股價升勢未完，不妨逢低吸納。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com