消息不似預期 見光即死
2017年10月12日
特首林鄭月娥宣讀首份《施政報告》，醒目資金喺出報告前偷步炒一炒，到報告出籠指數轉升為跌，最終收市跌左過百點，有啲反高潮味道，之前大炒嘅地產股更加係重傷。
林鄭宣讀報告，都算係灑吓金錢，當中最大動作係增聘公報員，編制擴大百分之三，實際人數差唔多五千人，當平均人工
二萬五計，一年開支多十五億。政府工係鐵飯碗，呢招大聘人手對打工仔係好消息，會扯緊市場一啲人手，中小企老闆就頭痕啦。林鄭作為公務員出身嘅特首，佢同商界成日覺得政府太多人、太臃腫嘅想法唔同，亦同前財爺鬍鬙曾嘅小政府哲學南轅北轍。林鄭小灑金錢，會增加內部經濟一啲熱度，有可能令勞工短缺加劇。
官商合作不宜高調
公眾嘅焦點係首置上車盤，呢個概念先前吹得好勁，報告揭盅提出具體方案，大方向係發展商補地價同投地嗰陣，要將部份單位用作上車盤。
但講出嚟嘅地皮只係話用賣地表上嘅安達臣道地皮做先導計劃，至於發展商改用途會唔會因此容易左，報告無提到。
市場人士聽到，就覺得係雷聲大、雨點好小。中產上車盤開頭只得1000伙，有中環茶友笑言，呢個政策涉及官商合作，講多好易錯多，林鄭都唔敢講太多。但現實上出年先搞先導計劃，大家都唔好期望出年會有好多首置上車盤，自然亦唔能夠望發展商因為呢個計劃推多好多農地變住宅地。
消息不似預期，前日炒地產股嘅股民中晒伏，恒基(012) 急跌2.7元，大跌4.9%，報收52.55元，上日升3.4%，一跌就跌凸。其他地產股已經叫做無跌咁多，新地都跌2.3元，跌1.8%，收報129.5元。炒農地概念嘅股民，早一日高追者即時綁住左。
兩大代理之一嘅美聯住宅部高層就話，「首置上車盤」先導計劃僅設1000伙，合資格人士佔約20萬，加上選址喺市區，唔符合市場預期。
佢又話，報告提出嘅「白居二」及「綠置居」恒常化，供應量增多，或者會對細價樓造成影響。代理最驚係資助房屋大增，皆因呢啲樓唔需要代理幫手賣樓，推得多即係等如打爛佢地飯碗，所以未來會唔會添食，都對美聯(1200) 有直接影響，隻股跌1.4%收2.19元。
成個預算案俾人嘅感覺係地產無太多新猷，其實對地產股不是壞事。另外好多位都有派水，有啲似二十年前特首董建華上場時派吓錢嘅味道。
從過去經驗嚟睇，樓市過熱固然難搞，但樓市爆破後果仲嚴重，所以女特首要幫樓市放氣，有啲車前退後無大作為嘅感覺。
升升停停唔係壞事
《施政報告》無乜火，雖然美股再創新高，但港股11點後開始下跌，恒指收報28389，跌101點；國企指數收報11411，跌7點，成交1123億元。
寶馬高層話，公司正考慮喺華東城市常熟同長城汽車(2333) 合設組裝廠嘅可能性。長城汽車股價一度飆漲19.2%，觸及超過兩年最高位，收市仍漲14.4%，收報11.3元；長城汽車A股就停牌等待發佈一項公告。
港股升近10年高位，急升反而令人擔心，升升停停唔係壞事，回調到咁上下，就可以買吓強勢股好似金融板塊咁啦。
陸羽仁
金融High Tea 舊文
來源 source: http://hdfin.stheadline.com