【大茶飯】平保機械式買匯控（青冰）
來到2018年最後半個交易日，近期頭條應是美股A股化，日日上落幾巴仙，仲要用過山車式轉向，很多人歸咎於程式主導大市，不過咁講就代表你假設了程式係喜歡推波助瀾，是否完全合理呢？程式盤有自己的出市入市訊號，機械式到價做嘢，斬纜又快又狠，如果市場承接力唔夠
，的確係會做成更大波動，波動有機會令程式盤短時間內先觸發入市再觸發止蝕，左一巴右一巴，年尾不少「人」已經收手收燼，相對上「它們」的佔比率咪高囉，所以重點都係市場深度不足而已。
講開機械式，青冰有個有趣發現，就是平保(2318)最近年半都好喜歡機械式買匯控(0005)。青冰早前都有撰文講過平保買匯控，其中一個結論係他們全是用上海那邊的港股通買貨，如果再細心看，他們買貨都有一個特點，就是機械式連續買約十日，之後就會收手，幾個月內都唔再鬱手。
平保首次申報持有匯控5%，是在去年12月，睇CCASS數據，他們從11月27日連續10個交易日凈買入，持股由4.92%急增至5.41%，合共買了1億股；第二輪攻勢是在今年初，由1月31日起連買9日，持股由5.62%增至6.43%，合共買了1.64億股；第三次是由9月3日連買13日，持股由6.42%增至6.71%；第四次是由10月8日連買9日，持股由6.75%增至7.08%，停咗4日後再買8日，持股再增至7.32%。
以上是假設大部分從上海來的港股通資金都是來自平保，如果你用他們3次的權藍披露日子與CCASS對比，是非常吻合的。
買貨的原因有好多個說法，在乎你信是商業定政治動機，但點解每次都係連續10日咁買，買完又停手幾個月呢？他們買貨，似乎同股價的關係不大，唔會因為嗰輪匯控好弱就買多啲，股價高位就買少啲，亦不是消息主導，青冰反而留意到以上四次入市，有兩次係除息前狂掃，不過匯控一年派四次，又不是次次有入貨啊。
咁機械式咁買，買完又停，給青冰的感覺就是資金到位就買，啲錢用完就停。不過這些數據似乎帶唔到獲利機會畀大家，幾次入市，匯控最叻都係升2至3%，有兩次仲係愈買愈跌添。
下次匯控除凈將是2月21日，內地新春假期後首個港股通交易日是2月11日，換言之除凈前有8日可買，戰友不妨望實屆時的港股通數字，再考證一下他們是否好息之人吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com