笑到最後 - 高明 2018年12月31日
笑到最後：平機票輸出麻煩遊客 - 高明
香港航空 適中字型 較大字型
日本有電視台製作節目，列出麻煩遊客喺6個日本景點做出「乞人憎」行為，一如所料香港人榜上有名，與我國同胞一同分享被日本人心底咒罵的榮耀。觸發呢種民族情緒，同文化家教有少少關係，但更大嘅關係，係嚟至廉航帶動嘅平機票。
回顧過去幾年，香港人唔鍾意中國遊客，大部份人都捉錯用神，話中國人本身嘅行為有問題，事實上，稍有國際視野，就會知道，中國人有嘅惡行，全世界大部份民族都會有，例如周街屙尿，歐洲一樣有白種人飲醉就屙，入球場前又屙。有投資經驗嘅人，對以上問題會睇得較通透，一般金融銷售口號不外乎：十三億人，1%人同你做生意都發啦。換算以上問題：十三億人，有1%人周街屙尿，已經有1,300萬人周街屙尿。不文明遊客行為，引致令人討厭嘅觸發點，一定係量。
主觀上，全球絕大多數國家都未富先驕，例如全日本今年頭10個月接收2,611萬名旅客，已經拍曬片嗌救命，香港一個城市仔今年已收2,983萬名旅客。對於好多國家，只要過千萬遊客，已經頂唔順。
本來小香港只得區區700萬人，全部人口去日本都不及我國1%，但廉航嘅出現，連帶傳統航空公司機票票價都大幅下降，例如近日債券息率扯高至191厘嘅香港航空，單從票價，已同廉航相差唔遠。一啲本來只係想去深圳嘅人，無啦啦都坐飛機去日本，最有代表性就係，北海道一個不毛之地撞車，兩名事主都係港人，可見幾多香港人假期到日本「回鄉」。
曾經何時，搭一次飛機、去一次日本，係一件人生大事，一般人會以搭過飛機界定自己係邊種人。今日機票平到就連攞緊綜援嘅人，一年去四次日本都冇難度。2018年過去，本欄預言，飛日本機票價格首站目標價，會同高鐵返廣州票價睇齊，未來會有更多掛住你個朵嘅人，四圍出國惹麻煩；至於投資方面，做航空公司嘅顧客，肯定著數過做股東。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com