智取大市 - 晉佳 2019年3月20日
智取大市：低估值加高股息 - 晉佳
東嶽如果業務回穩，嚟緊市盈率隨時變低單位數。資料圖片 適中字型 較大字型
內房股百花齊放，大概知道整體中港股買需有幾強。睇月線圖，恒指有長線升勢加速之感。呢一刻唔使睇到咁遠，日日有資金炒股不炒市，市底好就無謂擔心太多嘢住。
上期講嘅東嶽（189），如果業務回穩，嚟緊市盈率隨時變低單位數，加上每年有逾10億人民幣現金流回籠，估值咁平，總有缺點，原因係新華聯持股同埋間中利用現金做非本業投資，例如內房，大家半信半疑。不過，以2017年計，現價股息率都有5厘樓上，相信嚟緊都會保持高股息率，要洗底就要有股息令投資者放心。
東嶽業績3個部份，高分子材料、雪種及有機矽。收入比重相若，高分子材料方面，產品線不斷增加至不同類別化工產品用途，例如FKM同PVDF可用於航天、鋰電池物料之用，未來亦增加膜功能材料生產，本業有競爭力。
家電以舊換新政策，海信（921）等等家電股已爆上，加上內房回暖，國策及需求帶動下，冷氣機雪種需求預計會改善。舊年下半年有機矽價格下挫，今年初亦有回穩跡象。換言之，東嶽3個業務板塊，呢一刻都似變進攻球員，之所以市盈率有可能降至低單位數，當然，講緊喺現價計算吧。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com