港鐵抗跌勁過波音
2019年03月20日
港股前日大升後，噚日開市調整消化，但大市暫時未肯回落，收市再升57點。中美股市近日都升近高位，去到呢個水平，好多人都心情忐忑，甚至有部份財金界老手都有呢個感覺。有中環財金界講起，中港股市喺中美貿易談判好似有機會達成協議下，逐步升到
高水平，若然有乜嘢壞消息，會否一下子就急跌落嚟？
摩笛投機炒萬洲
全球股市喺今年首季反彈，至今累積升幅唔少，以美股為例，彈幅差不多接近14%，恒指自去年10月30日低位24,540點起反覆回升，至今累計升幅達兩成。大家見過之前炒到㷫烚烚時大插嘅經驗，自然擔心重蹈覆轍。呢次帶動股市回升，一個理由係中美貿易談判，美國之前不斷放出利好消息，反而令人擔心會有反高潮。中環財金界話，中美談判愈傾到尾難度愈高，未到最後一刻達成協議，都唔可以當真。
從炒股角度，中美貿易談判是否真係達成協議最好呢？佢認為呢個唔係關鍵，關鍵反而係關稅問題，若然雙方無法協議跟住反枱加稅，股市當然大鑊，相反，若然未有協議繼續維持現有狀況，咁其實無所謂，因為一旦宣佈達成協議，有可能好消息出貨。
除了中美貿談，另一個影響係資金流向，港匯本周繼續疲弱，聞說有港元換成人仔北上。從滬港通數據顯示，近期資金返回內地確係增多。加上內地放水，中央之前降準，兩會又宣佈減稅。財金界話中央希望放水搞活經濟，同時唔希望太多資金流入股市亂炒，但無論點都好，資金供應增加，都對內地股市有正面作用，亦帶起港股。按照呢兩個因素，唔排除當大家驚個市跌，個市偏就唔跌，當大家放心買貨之時，先係真正危險嘅時間？
太古望重返紅底股
港股拒絕調整，恒生指數收市升57點，報29,466點，四連升，為去年6月20日以來收市新高；國企指數升11點，報11,686點。喺市場觀望短期大市可能會回吐下，成交縮至993億元。藍籌股噚日有兩隻比較搶眼，一隻係豬肉股萬洲國際(288) 。由於大摩發表短期策略報告，料未來30日上升機會大，該股股價曾升至8.74元，股價續創超過九個半月新高，大升5.5%，報8.67元，為全日表現最佳藍籌。有喺美國賣豬肉嘅萬洲去年遇上中美爭拗股價遭殃，今年開始轉運，現在連美資大行都加入唱好。要留意係摩笛變幻不定，而且話明係短炒，聽完都未必要信到十足，跟炒要做好兩手準備。
另一隻話題股係港鐵(066) ，公司股價喺前日撞車意外後跌完企穩，噚日先跌午後回升0.4%，收報47.9元，有中環茶友講笑話港鐵勁過波音，股價抵受撞擊力非常堅。港鐵股價無被撞車意外拖累，主要係要為事件負責任嘅係加拿大承建商，港鐵喺危機應變處理都算快，盡量公佈解畫，避過了一場公關災難。另一方面，正如陸羽仁之前話過，港鐵最神係旗下鐵路項目進入收成期，加上政府無地，所以開正公司造地嗰瓣。美國議息睇怕唔會加，近排美息仲回落，對港鐵其實都係利好消息，所以除咗此股外，本地地產股普遍向好，恒地(012) 收升0.3%，報45.6元；信置(083) 升0.68%，報14.76元；嘉里(683) 升5.39%，報34.25元。陸羽仁近日點評較多嘅太古(019) 獲大摩調升目標價，股價一度創近一年高，見99.2元，收升2.75%，報98.9元，如果大市續好，太古有望好快重返紅底行列。
飛思達科技(1782) 股價走強，新報1.2元，升30%。集團行政總裁施德群表示，現時集團有參與內地5G實驗網測試，由實驗網到試商用，再到商用，營運商喺試商用階段先會開始採購，故預期明年下半年業績上先會開始反映5G相關收入。該公司主要做機頂盒應用方案。早前由創業板轉主板，公司規模同市值非常細小，現價市盈率18倍，有1.5厘息率，異動多少係睇準有概念所以投機炒一轉。
陸羽仁
金融High Tea - 陸羽仁 舊文
來源 source: http://hdfin.stheadline.com