笑到最後｜加息周期 點解英國樓市仲升緊？（高明）
笑到最後｜加息周期 點解英國樓市仲升緊？（高明）
英國樓市都算硬淨，經歷脫歐、疫情、換相、英女皇駕崩等，起碼冇好似其他新興市場資產下跌。
每次美國加息，影響最大就係一啲新興市場。而家已經係2022年，新興市場並唔係局限於地域上邊，加密貨
幣就係新興市場，高科技股亦係新興市場，NFT同Web 3都係新興市場。
所以大家都見到，上述嘅市場喺美國過去大半年加息周期陷入低迷，以加密貨幣為例，持有實貨加密貨幣只係承受價格下跌，如果持有合約就有機會輸清光同輸突變負資產。另外亦有其他新興市場樓市出現違約及爛尾風險，好大程度都係美國加息嘅副作用。
香港樓市喺美國加息期間一直向好，所以本欄不贅。近年好多香港人去英國買樓，不論係出於自住定係投資，英國銀行Halifax數據指，8 月份房屋的平均價格為294,260英鎊，按月升0.4%，創歷史新高，但增長放緩，由7月份11.8%降至11.5%，為三個月以來的最低水平。
以美國加息嘅背景黎計，英國樓市都算硬淨，經歷脫歐、疫情、換相、英女皇駕崩等，起碼冇好似其他新興市場資產下跌。樓市同其他資產唔同，並無沽空制度，而技術上亦無可能事先沽出一間未起嘅樓，就算你做到亦唔係相同嘅貨品，一句風水唔啱已經可以唔收貨，股票唔同，大家股普通股Tesla（TSLA）其實係一樣。
冇沽空 較貼近需求
冇沽空，對投資嘅啟示係：一、冇挾倉行為，不論係挾好倉定係挾淡倉，走勢相對會較貼近需求，相對如果有得沽空，以恒指為例，升市嘅時候總有班人包拗頸買熊，就會有多個尾程優惠挾淡倉，反之亦然；二、既然冇得沽空，睇淡係冇Point、冇意義，因為就算睇中下跌，都唔會有好具體嘅收入，曾經持貨並沽出只可以賺錢或止蝕，但並冇喺跌勢中獲利，壞處係理智投資者睇淡嘅話，就會完全無視呢個市場，搵淡友嚟打返旺個市都難，跌勢後恢復要好耐，例如日本樓市。
所以樓市都係簡單對貴國綜合體驗嘅一次用錢投票，本國同外國人覺得喺你度買樓過唔過癮，以及嗰個國家供應到啲乜畀人，比較直接嘅供應同需求分析，外加少少息口影響，因為多數要按揭借錢買，香港人去到一炮過買唔係常態。
英國政府2019年定下2020年代中每年起30萬間新樓嘅宏願，不過，19至20年埋單起咗242,700間，20至21年起咗216,490間，另一數字，2022年估計全年起20.5萬間，由於1970年開始，每年平均約起 25萬間，呢兩年半嘅起樓量跑輸目標之餘，仲要跑輸長線建屋量，點解？其間又疫情、脫歐東歐工人離開、供應鏈短缺、航運運費加價、油氣價上升，更加重要係加息，發展商都係同大家一樣睇數字估估嚇，息口成本上升，自己融資貴咗，喺個人感受下估買家都受加按息影響買得冇咁爽手，從而拖慢嚟起，反而托得住個價。
英鎊滙率兌港元接近9算，CPI升一成，但都跟唔足美國聯儲局加息幅度，滙率低英國貨變相九折，只要冇根本性嘅變化，兌美元慢慢貶值係大部份國家想見嘅事，例如暑假初期美媒吹雞，歐元貶值，歐洲旅行九折，希斯羅機場生意多到要勸停航班。
至於英國樓市，2022年都過埋中秋，全球有合約精神嘅地區買少見少，英國同時換君主及首相，只要合約精神未變，即係贏咗錢拎得走，有信用嘅地方，一定大把捧場客。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com