金融High Tea 2013年6月19日
金融High Tea——有人辭官歸故里
2013年6月19日
呢一排金融市場受盡美國聯儲局可能收水的困擾，終於「審判日」到啦，聯儲局呢兩日開會，今晚半夜就有結果，美股近日穩定下來，似乎在博聯儲局主席伯南克唔講嘢、舞照跳。昨日港股極其觀望，無升跌。
港股呢一浪反彈，可以去到幾高真係要睇伯南克點玩，家250天線係21545點，聯儲局無嘢講無話要收水，港股可以有較大幅反彈，升穿250天線無難度，但若有收水暗示甚至明示，反彈未到250天線就會回頭，開大開細無人知。
前排環球大勢係資金撤退，熱錢加速撤離大中華區。在截至6月12日的過去一個月內，有52億美元流出內地和香港股市。有分析員形容，規模係金融海嘯以來最大，速度之快更係五年來少見。金管局昨日公佈的銀行體系結餘是1638億元，相比年初高峰的2558億元縮水36%。
人仔有貶值壓力
中國資本市場更係面臨內憂外患。內地銀行間流動性緊張，上海銀行同業拆息平均利率超過6厘，5月份經濟數據令人失望：出口微增1%，社會融資總量降至1.2萬億元。多間大行先後調低中國經濟增長預測。大摩預測內地經濟全年增長7.6%，遠低於早前預測的8.2%。瑞銀和RBS將預測值調低到7.5%，巴克萊的預測只有7.4%，是二十三年來新低；野村睇得最淡，認為下半年經濟增速有三成幾低於7%，更係打壓了市場信心。
除中金之外，摩根大通亦都估未來人民幣有貶值風險，摩通首席經濟學家朱海斌話，「中國新政府可承受7至8%的較低經濟增速。當前中國經濟最大的不確定性在於新增的社會融資總量無法刺激實體經濟增長，投資效率偏低。」佢預測人民幣在未來一至兩個月內將會貶值，主因係「疲弱的經濟資料無法支撐人民幣持續升值，資本會從三季度起出現淨流出。」存人仔者要留意匯價風險。
家無乜人夠膽買紅色股，資金流出股市，唯有國家隊進場，匯金公司再次出手增持國有四大銀行工行(1398)、建行(939)、中行(3988)和農行(1288)的股份。
匯金增持可以視為政策性增持，唔一定咁睇市場效益，但內地股市對匯金入場反應唔大，主要係怕重啟新股上市，內地監管層近日召集各大證券商高管舉行座談會，要求各家證券商做好IPO重啟準備，時間已初步確立在7月底。內地股市在匯金入場後昨日只升0.1%，就係被重啟IPO打窒。
中投睇淡光伏股
即使阿爺機構，只要唔係政策性購買，都唔見得咁睇好股市。前日大炒嘅太陽能股，點知中投突然減持保利協鑫(3800)，搞到隻股昨日大插12.4%至1.84元。皆因第二大股東中投公司減持12億股，每股作價1.87元，減持價較上日收市價大折讓11%，套現22.44億元，結果保利協鑫收市連中投減持價都跌穿埋。舉一反三，保利協鑫周一大升，似乎都係推高俾中投有水位大折讓批咁多貨出街。
睇番中投於2009年12月入股保利協鑫，當時每股作價1.79元，今次減持近一半貨，以是次配售價1.87元計，帳面微賺4.4%，若計及保利協鑫的兩次派息共10.6仙，帳面共賺2.2億元，回報率為10.4%，揸三年半這種回報一啲都唔多，但換一個角度，中投似乎唔蝕都想沽。可以預計若保利協鑫再升，中投會清埋手上的12%貨。
高盛剛剛話中央明撐光伏股，保利協鑫前景清晰，預計其今年至2015年盈利複合增長率達1.45倍，故大幅上調其目標價66.7%至3元，投資評級亦由「中性」升至「買入」。到底中投睇得啱，定高盛睇得啱呢？
有人辭官歸故里，有人漏夜趕科場，我覺得中投對光伏行業、甚至內地經濟前景都睇得幾負面，有得走就走。若借用此分析，內地對香港影響唔細，唔好太快對個市睇得太好，反彈一兩星期後，還有風浪跟尾。
陸羽仁
上一頁 下一頁
金融High Tea 舊文