金融High Tea 2013年6月24日
金融High Tea——積財成富
2013年6月24日
港股上周大跌，成個星期唔見咗706點，報收20263點，表面睇係跌美國聯儲局收水，但實質上係美國和中國雙鬼拍門，美國收水的影響講咗好多，中國拖低港股的影響講少啲，不妨再講講。
周末有個大孖沙打電話來傾起，佢有啲勞嘈，話港股跌咁多同內地有關，佢話聽內地富豪講，上海銀行同業拆息抽到咁高，搞到內地水頭極緊，內地有錢人要四圍撲水，咁搞法股市真係無運行。
我話半年結臨近，阿爺好明顯要脅啲銀行交數，邊間內銀私底下搞或幫人搞影子銀行、邊間違規借錢畀房地產商，全部現晒形，要被佢哋跪玻璃，過程雖然痛苦，但應該唔會爆煲，內地賓卡見到棺材時，自然要坦白從寬，你認罪阿爺無必要迫死間銀行。
大孖沙話習總上台後，手段強硬，例如打擊三公消費，例如要經濟繼續轉型，都係三令五申話做就做，擔心出手太重經濟頂唔順。
中國調整 香港陣痛
我話阿爺面對緊的是兩難題，過去十年胡溫年代搞得太鬆，經濟粗放成長，銀根氾濫成災，唔調整未來是死路一條，調整又會好痛，例如減少貨幣供應銀根就好緊，經濟轉型低檔加工廠就倒閉，控制樓價地價地方政府和發展商就叫苦連天，真係搞又死唔搞又死。
我估習總會繼續調整，唔係咁易讓步放手。中國調整，香港難免感受到陣痛，結論係唔可以一面倒睇好。特別在美國收水資金要流出中國等新興市場時，中國還要自斬兩刀，震盪難免。
聯繫到股市投資，要有避險之心，或者起碼有心理準備，股市未必一插就見底，還可能有第二波要承受。網友「小貓愛情觀」在上周四跌市時有一個留言問題，可以和大家分享，佢話︰「陸Sir，我雖然是第一次留言，但陸Sir許多年來的金融High Tea和網誌一直是我每天必看，是我投資時佔主要比重的考慮因素，而且也很幸運地一直投資得很順利。」
小貓續說︰「因為發現陸Sir很客觀，而且經常苦口婆心地提醒大家，注意潛在風險，不要過份受市場氣氛影響，應重視價值投資。您雖然每天都有分析市場，但卻很少會主動像一般評論員般對個別股票『說升道跌』，但股市當真的接近波幅臨界點時，陸Sir又會忍不住出來『分析』個別股票的『前景』(特別是內銀)，這就是我主要留意的『訊號』，而我為了簡化和容易操作(因為要工作沒法貼市)， 只買建、農、中、工這幾隻，而且都是慢慢收集，持貨半年以上，然後高位沽出。然後又等……等下一次的『訊號』這樣操作雖然沒甚麼技巧，但省心，最重要的是達到了投資增值的目的。(再一次說聲謝謝)」
資金流港 只為避險
佢話︰「繼年頭沽出所有股票後，待今天(上周四)才開始收集939(5.2元)，(因為離52周低位10%)然後打算到52周低位時會動用50%資金買入內銀(含工商、中行)，留部份資金作意外跌市時部署。數年後打算沽出全部股票(如果樓市下跌40%)，用按揭倍大投資金額買樓收租，請問這樣的投資策略風險大嗎？(或者是否太保守了呢？)」
這麼長篇引述小貓的留言，除了寫少幾段騙騙稿費之外，亦因為我發覺佢相當細心，觀察到我寫文章背後的用意。我對佢的留言及問題，有以下幾點回應。第一點是迴避風險。好多股評人鍾意講機會，但我鍾意講風險。
股市天天有機會，日日有冧巴，我認為若果做即日鮮炒作咁容易，買份報紙落吓注就成功，香港仲有窮人？我鍾意講風險，因為一流的投資人或大炒家，他們投資除了考慮回報外，放好多精力去避險。避險係專業投資者的基本動作，例如近日港元匯價上升，有人見股票大跌但港元轉強，話唔知點解，因為「正常」時是當資金流入港匯轉強時就是升市時，點解而家跌市港匯都會強？佢無注意到而家美元正在上升，亞洲貨幣大跌，資金在區內沽了亞幣，因為種種原因暫時唔想將資金調回美國(例如稅務原因)，而港元和美元掛鈎，資金留港匯率風險好少，就將錢臨時泊在香港。講番避險，投資股票識得避險，已經成功咗一半。
第二高沽低買。呢句話講就易，做就難。好多散戶剛好相反，受市場氣氛影響，高買低沽。股市好時散戶受高漲的行情影響，例如今年年頭個市好，好多人見當時好市就睇今年見27000點、28000點，你在那時走去買，買到成手貨，如今已無錢買。相反而家跌得都幾甘，市場氣氛好差，你又是不是想沽清手上的貨呢？短炒要順勢，中長線要逆市，在市況低迷時要有技巧去買。
第三借股說市。股評人不易為，我今天寫一隻股，佢明天不升反跌，你跟我買咗立即會媽媽聲。我話大市見底，但佢再跌多1000點，我的娘親也會被人問候。幾年前在中環遇上一個著名股評人，佢當時話：「我最近被人媽得好緊要，我去年12月話個市升到癲要跌，但如今4月個市都唔跌，我要搵個洞去『捐』。」佢的經驗值得記取，所以跌市中我亦唔估底，例如今年低位究竟是上周五低位19969點的水平，是再跌低啲見19000點，還是跌到18000點去番舊年低位，唔係咁易估。
一年一轉候低買股
我俾小貓講中，過去我覺得個市跌到差唔多，又真係會間接啲講吓股份的價值，例如去年7、8月我會講吓內銀股價值顯現，的確是一種借股說市的行為，因為講一隻股跌到好低市盈率好高息率，佢風險的確較低，比較易明，但講大市就難明啲。
補充一句，而家匯控(005)的狀況比內銀好，因為環球利息向上有利銀行賺息差，對大銀行有利，但匯控目前的唔好處是跌得唔夠多。
第四累積財富。一年買賣一次，低買大股高沽，看似好笨，但若每年有20%以上回報，長線條數已經好和味。若是一個如美股的大牛市，出出入入，不如長揸到尾，但港股不是如此。你睇港股過去四年表現，基本上係一個上落市，恒指早兩年在16000點和25000點中間走動，近兩年在18000至24000點中間走，皆因美國印錢，內地收水，香港鬱悶，暫時亦未看到有突破機會，所以你上到高位唔沽，低位亦無錢買，手上股票只能長揸收息。相反若在高位減貨，低位揸番，係近年上落市一個累積財富之道。積少成多，比一朝發達容易。
小貓希望用這個方法投資幾年，然後等樓市下跌，買樓收租，我覺得得喎。有急功近利者或許會覺得太慢，但每年有穩定回報，慢啲唔緊要，假設一年有20%回報，複式增長，四年就可以翻一番。有啲人博短炒，可能幾個月翻倍，同樣可能幾個月輸清。而穩陣投資者或許會覺得出出入入好煩，但在這種上落市，唔出入一年可能只收3、4厘息，回報低好多。
陸羽仁
上一頁 下一頁
金融High Tea 舊文