金融High Tea 2013年9月25日
金融High Tea——尋找新世界
2013年9月25日
■里昂預計，未來十八個月，香港樓價會下調一成半，原因是供應增加同利率上升，住宅租金會跌一成。港府的辣招不會取消，故此不看好地產商未來幾年的表現。
美國聯邦儲備局上周會議，決定九月不退市，全球股市出現亢奮，但跟住好快大家冷靜下來，焦點又去番預見的問題，好似國債上限，內地調控等，港股升咗一日就回落，連續兩日調整，差不多還原基本步，去番之前未升的水平。
退市彈弓手，本港地產股翌日抽上，有中環茶友立即出手，再沽手頭上的地產股。茶友話，近日大地產商紛紛出來唱淡後市，擺明係知道富不與官爭的道理，照咁睇樓價點都會出現政策性調整，唔跌多都跌少，點知咁啱美國佬話唔退市住，地產股同房託股借啲意扯高，咁都唔沽佢就真係笨！
地產股唔沽就笨
茶友睇淡樓價，銀行同大行好似都配合埋政府，東亞銀行話樓價要下跌超過兩成，先至跌到去港人負擔能力。大行里昂就預計，未來十八個月，香港樓價會下調一成半，原因是供應增加同利率上升，住宅租金會跌一成。里昂仲話，港府的辣招不會取消，故此不看好地產商未來幾年的表現，尤其前高價買地公司。
大行睇樓市，主要從股價分析去炒前景。茶友話，香港地少人多，加上內地有錢人湧落嚟，本來住宅供應多多唔夠，政府若不是重手打壓，樓價真係升到阿媽都唔認得，而家政府猛落辣招，雖然唔代表無人買樓，但投資炒賣風險好大，咁即係話地產股炒作空間有限，大行自然唱淡一番，踩番兩腳先算，所以早前地產股回升只係「死貓彈」，真係無理由唔沽佢喎！
茶友話，地產股抵沽，房託股仲抵沽，說到尾地產股應變比較靈活，房託一味收租，若然樓市無景，息口若然上升，呢類公司仲更加捱打啦！
本港地產股無料到，市場焦點轉咗去內地，人行加碼放水，推出880億元人民幣6天期逆回購操作，但內地「錢緊」困局未解決，加上憂慮美國債務上限問題，同時市場擔心德國總理默克爾能否順利籌組新聯盟政府，多項不利因素夾擊下，港股周二再跌近兩百點，恒生指數險守十天線(23139)收市，收報23179，跌192點；國企指數收報10599，跌118點，成交金額577.5億元。
內地近日再現多幅新地王，市場再傳房產稅試點步伐醞釀加快，杭州房產稅試點消息早已披露，有望在年內推出，南京、青島、大連等地也被業內認為有可能納入試點，令內房股普遍受壓。華潤置地(1109)跌3%，報22.55元，跑輸一眾藍籌；中國海外(688)下滑2%。
移動通訊掀尋金熱
房地產成為中港政府打壓目標，市場唯有另尋目標，由於有消息工信部周末於內地發放4G牌照，電訊設備股受追捧。中興通訊(763)升3%，；京信通信(2342)走高4%，究竟到消息真係公佈時，會否出現好消息沽貨，投資者就要買吓大細嘞。
由於移動通訊已經動起來，相關板塊已經成為投資者在房地產以外，憧憬的新世界，由網絡商、設備商、手機製造商以至電玩商、服務供應商，都吸引了大大小小資金進場。
勇闖新世界需要勇氣，但同時更需要知識與智慧，過去投資房地產只要睇準大勢，一坐到尾就可以成為贏家，分別只係買得大贏得多、買得細贏得少，可惜呢個容易搵錢的年代已經過去，跟住下來的新世界，想賺錢就要畀多小小心機先有成功機會啦！
陸羽仁
上一頁 下一頁
金融High Tea 舊文