陸羽仁 BLOG 2013年10月11日
收夠籌
2013/10/11 上午 09:26:33
網誌分類: 經濟
美股昨日大暴走，皆因在野共和黨放風可以暫時提高債務上限，下周四到期的債危機可望舒緩，杜指昨日開市就吧吧聲一路向上，升到收場，以全日最高位收市，勁為323點至15126點，升幅2.2%，係今年最高的單日升幅；標普500指數亦升2.2%或36點至1693點。
美股升勢全面，大中細型股、金融股、工業股、原材料股、零售、連印度、俄羅斯、泰國、巴西等國家ETFs幾全線向上。股票升跌比例去到9比1。有交易員笑到見牙唔見眼咁話，隨便掟塊石頭入去紐交所，都會掟中一隻起碼升1.5%至2%的股票！
其中升得最勁的是近期插得最深的生化股、中國科網、Facebook, Netflix等高風險(High-Beta)類股，這些股市今年升到癲，例如Facebook全年升了84%，Netflix大漲228%；Tesla 升410%，唔少對沖基金(hedge fund)趁近期的政治市大沽特沽這些高風險股博開餐，昨日大市突然急轉彎，對沖基金補倉救亡，就加速推高大市。Facebook及Netflix紛紛抽高近半成。
美股忽然大暴走，原因只有一個，就係美國債務上限僵局有化解的跡象。共和黨眾議院議長博納昨日表示，共和黨支持暫時提高國債上限六個星期，以換取和總統奧巴馬討論預算和赤字問題。白宮發言人歡迎共和黨支持提高債務上限，但堅持要同時終止政府關門。
有市場交易員問共和黨未有在預算案問題上放水，意味著美國政府關門問題未解決，點解個市要升咁多? 理由好簡單，除了沽空盤好多一回頭就要平倉的技術因素之外，市場最擔心的是債務上限解決唔到會導致違約，那怕是短暫的違約，都會造成好致命的危機，政府停運做成的不便及經濟損失，都只係次要的問題。現在多出六個星期的談判時間，大大降低了美國政府違約的風險，投資者鬆口氣，股市恐懼指標CBOE波動指數(VIX) 亦由19點大跌14%至16.79點，壓抑了近兩周的投資情緒即時爆發，股市大幅反彈！標普500指數至上日計，較高位回落4.1%，現在反彈2.2%，仍在合理幅度。
至於於點解共和黨忽然轉軚？唔排除其中原因係瑞銀(UBS)的紐交所交易主管Art Cashin上周所講的，兩黨見到支持他們搞對抗的政治捐獻已經差唔多乾塘，再搞落去都唔會收到太多「水」，加上債務上限「死線」臨近，真係爆太鑊的話，怕衰唔起，都係見好就收啦！正如博納昨日表示，「無人能夠得到他想要的每一樣東西。」
美國債務問題暫解，國企股早前回吐較深，可以吸納。
陸羽仁
回應(5) 我想回應
陸羽仁 BLOG 舊文