金融High Tea 2013年12月27日
短暫昇平
2013年12月27日
聖誕前夕，人行按照劇本啟動逆回購，令港股周二半日市高收；加上美股大派禮物，創出新高，相信有利港股今日復市造好。
科網股宜跟炒
美股今年大放異彩，杜指扣除通脹後，升幅已超過上次牛市時的高點，今次牛市由央行放水推動，加上科技巨擘橫空出世，狂牛可以橫行到幾時，專家各有各睇法。中環茶友話，升市莫估頂、跌市莫估底。美股現時理論上已經無阻力，呢個時候雖然估值已經唔平，但唔買都唔好沽空，以防被人夾到七彩。
今年美股牛市，其中一隻神仙股係Netifax，佢通過自家製作的視頻劇集大收旺場。呢兩日朋友聚會，講起係網上追睇該公司製作的長篇劇《Breaking Bad》(港譯奪命毒師)，呢套劇係講大學教授忽然知道自己患上絕症，暗悲一事無成，狠心放下道德包袱，竟搖身變成大毒販。幾位茶友話睇到如癡如醉，大讚橋段好嘢，佈局引人入勝，人物心理描寫深刻，認定佢會打破美國電視市場的權力均衡，甚至係全世界電視市場中搶走大批觀眾。華爾街一眾炒友先知先覺，老早炒高Netifax股價兩三倍，成為今年派彩最和味的冷門股。
有人話，在中港兩地炒科網股，最簡單的方法係照抄美國模式，美國炒亞馬遜、內地咪炒阿里巴巴囉，將來內地有邊家公司會變Netifax仲要睇吓，但相信香港就無邊個可以做到，因為香港做來做去只得700幾萬人市場，想北上搞創作同科網，暫時仲係白日夢，因此美股雖然有牛市憧憬，港股就未必可以跟足，比較大機會都係掹吓車邊，跟炒吓科網概念。
反映科技股的美國納斯達克指數依家仲未創出歷史新高，樂觀派估計幾隻龍頭科網巨企仲有得去，如果係咁，香港都仲會繼續食吓水尾，不過就要記住呢類炒入來得快、去得快。
港股臨近結算兼埋年結，多得人行在平安夜送聖誕大禮，逆回購290億元人民幣放水，令近日狂升的上海拆息稍微回落，刺激周二僅得半日市的港股應聲造好，收市升逾257點，重返10天線(23092點)之上收市，收報23179點。
人行打完仔放水
今次人行放水，差不多係有了劇本照上演，在12月底前，企業要交足數，於是齊齊撲水，搞到拆息狂升，人行初期無咩動作，大家都知係阿爺要「教訓」壞孩子，令盤數有問題的企業要付出代價，希望慢慢改善企業陋習。阿爺打仔打到咁上下，都唔想搞到班仔內傷，於是就係適當時候泵番啲水入市。
由於人行開咗水閘，估計銀根會逐步紓緩，由於阿爺未放水前，港股因為呢個理由跌咗無1000都有500點，上周五跌市成交仲幾大吓，估計基金經理已經減咗相當磅數，應有足夠財力去粉飾吓盤數，如無重大不利消息，估計短暫個市會有番啲昇平氣氛，之後到明年開局再定牛熊嘞。
經過三連升後，內地股市昨日下跌。上證綜指收報2073點 ，跌33點。如果呢兩日人行繼續逆回購沖喜，正路反應係資金重返跌得較多的股份上，按照第四季走勢，估計內險將會跑贏內銀股，手頭內銀貨多的散戶，不妨趁反彈沽吓貨先。
陸羽仁
金融High Tea 舊文