魚樂無窮：四環兩賣點值得尊重 - 唐牛
■主打心腦血管藥股四環，去年盈利上升44%至13億人仔；圖為四環主席車馮升。資料圖片
剛剛先講而家冇人理指數表現，話口未完，噚日即刻插水近400點，認真小器。耶倫突然由鴿轉鷹，話儲局停止買債後6個月或會加息，息口敏感股如地產股及REITs首當其衝，全線受壓。
同一時間，中移動(941)業績強差人意，兼且削減派息，導致大戶散戶瘋狂掟貨，創52周新低可謂有根有據。科網股成為大市清泉，騰訊(700)業績雖遜預期，但有一拆五消息頂住，兩大小米概念股金山軟件(3888)及通達(698)，蟹民最多嘅文化中國(1060)更爆升15%，可以預期，科網股獨大嘅情況越嚟越明顯。
全城聚焦儲局加快加息步伐，其實儲局放棄以失業率6.5%作為加息嘅門檻指標，同樣不容忽視，事關未來政策能見度更低，處於高位嘅美股肯定更chok，港股波動性亦會加大。
今日推介主打心腦血管藥股四環(460)，去年盈利上升44%至13億人仔，毛利率亦升至78.2%，業績靚絕。另有兩個賣點更加值得加分，第一，噚日大跌市照升，反映資金寧願加碼也不獲利，後市易升難跌。第二，主要股東早排批股套現，雖然散水味濃，但批股價9.27元從未失守，有理由相信批貨已落入強手中，短線升多一成，應不成問題。
唐牛
上一則: 滙海探戈：息魔on your mark - 奇兵
下一則: 股場放大鏡：金活整固多時再起動 - 歐陽風
魚樂無窮 - 唐牛 舊文