金融High Tea 2014年3月21日
溫水煮蛙
2014年03月21日
被視為鴿派的聯儲局首位女主席耶倫，首次主持大局就揚刀立威，繼續減少買債之餘，仲廢除咗用失業率作為加息時間指標，令外界以為佢係溫和派者有啲跌眼鏡，港股喺咁環境下，開市就掉頭向下，跌幅無乜收窄。有中環茶友話，美國講明收水喎，港股算跌得少啦，仲笑問「近排做咗淡友的陸Sir你又點睇呀？」。
中美退市煲熟股民
茶友話指數唔算跌得多，呢樣嘢陸羽仁無意見，不過，就算指數唔跌得多，唔代表投資者無受傷，因為你睇番好多一年前散戶仲係熱炒的股份，家紛紛跌到低位，部份好似中移動(941) 係好多保守派散戶心目中的鐵股，點知由高位差唔多散低咗兩成，最慘係股價每天鋤你多一些，鋤到小股東周身傷。
陸羽仁用天氣的厄爾尼諾現象去形容3月份傳統好市變跌市的異象，呢種大氣候改變看似唔知點解，內裏有因有由，一個重大因素就係中美兩國收水。市場有啲消息，投資者聽咗就當消化咗，呢樣嘢有時啱有時唔啱，好似資金流動同息口去向，方向一日未改變，影響都會存在，而且仲可能一日一日加重。好以美國減少買債，即係流入資金少咗，影響再明顯啲係內地不斷正回購。美國減慢債只係扭慢放水的水喉，正回購直情係抽走水缺的水，抽抽下自然就退潮，咁咪發現好多人條泳褲被人沖走咗囉。
中美退市好似係溫水煮蛙，初期撻着咗個火，啲水熱都唔熱，有人知驚跳走咗，大多數人係觀望吓先，初頭覺得熱熱哋，到適應咗一陣覺得頂得順，就繼續坐落去，結果就被人慢慢煲熟！股民多數係買咗股，初頭蝕少少無走，跟住股價再跌蝕多咗，於是寄望彈一彈先減磅，當佢唔彈兼且再跌，股民被人煲到頭昏腦脹，好大機會繼續坐，最後點樣唔使講都知，所以買股最重要股價一旦開始出現虧損初期點處理，呢樣嘢好似健康出問題，應該病向淺中醫，如果唔捨得一次過斬倉離場，咁咪分段減磅囉，點都好過坐喺度畀人煲。
個市家跌咗唔少，尤其一啲舊經濟股，都已經幾殘吓，但陸羽仁講呢樣嘢唔係無用，因為家仲有好多當炒股份，仲未係跌得咁多，需要投資者自己睇住同執生。
殺完熊證有機唞唞
新任聯儲局主席耶倫上場，擺明要畀市場一個「下馬威」，加上人民銀行再度「收水」260億元人民幣，上證指數跌穿兩千點大關，諸多壞消息湧現下，港股跟隨美股上日急跌，全日最多瀉超過400點，成交增加至接近750億元，收報21182點，跌386點。
舊經濟股成為大戶糟質對象，匯控(005) 遭瑞信唱衰，股價十連跌，收報75.95元，跌0.85元，喺科網界屬舊科技龍頭的中移動中午公佈業績差過預期，午後最多曾插4.3%，低見66.5元，收報67元，挫2.5元或3.6%，該隻股份推冧恒指47點，仲有好多隻地產股都見一年低價，擔心美國聯儲局提早加息，本地地產股無運行係正常過正常的反應咯。反而騰訊(700) 業績遜預期，但因為拆細有炒作概念，股價急插後反彈，只係跌9.5元，應該算係跌得少，由於大戶已經係輪證市場殺咗唔少散戶，如果個市短期企得穩，就會殺番轉頭劏一浸好友都唔出奇。
陸羽仁
金融High Tea 舊文